لاہور: پاکستان میں پرتگال کے سفیر پالو ڈومینگوز نے وزیراعلیٰ پنجاب مریم نواز شریف سے ملاقات کی، جس میں پاکستان اور پرتگال کے درمیان دوطرفہ تعلقات، تجارت، سرمایہ کاری، زراعت، لائیوسٹاک، صحت، توانائی اور دیگر شعبوں میں تعاون کے فروغ پر تفصیلی تبادلہ خیال کیا گیا۔
ملاقات کے دوران دونوں فریقین نے پاکستان اور پرتگال کے درمیان تعلقات کو مزید مضبوط بنانے پر اتفاق کیا، جبکہ کاروباری روابط کو وسعت دینے کے لیے "پاکستان-پرتگال بزنس فورم” کے قیام کی تجویز پر بھی غور کیا گیا۔
وزیراعلیٰ مریم نواز شریف نے پرتگالی کمپنیوں کو پنجاب میں سرمایہ کاری اور کاروباری سرگرمیوں میں حصہ لینے کی دعوت دیتے ہوئے کہا کہ صوبے میں فارماسیوٹیکل، توانائی، آبی وسائل، صحت اور ڈیجیٹل جدت کے شعبوں میں سرمایہ کاری کے وسیع مواقع موجود ہیں۔ انہوں نے کہا کہ حکومت پنجاب غیر ملکی سرمایہ کاروں کو ہر ممکن سہولت فراہم کرنے کے لیے پرعزم ہے۔
انہوں نے مزید کہا کہ پاکستان اور پرتگال کے درمیان دیرینہ دوستانہ تعلقات کو ادارہ جاتی تعاون کے ذریعے مزید مضبوط بنایا جا سکتا ہے۔ ان کے مطابق سیاحت، ثقافتی روابط، تعلیمی تبادلوں اور باہمی افہام و تفہیم کے فروغ سے دونوں ممالک کے عوام مزید قریب آ سکتے ہیں۔
مریم نواز شریف نے اس موقع پر کہا کہ پاکستان میں نوجوانوں کی ایک بڑی تعداد پرتگالی فٹبالر کرسٹیانو رونالڈو کی مداح ہے، جبکہ پرتگالی ثقافت، زبان، ورثے اور علمی تبادلوں کو فروغ دے کر عوامی سطح پر تعلقات مزید مستحکم کیے جا سکتے ہیں۔
ملاقات میں لاہور اور لزبن کو جڑواں شہر (Twin Cities) قرار دینے کی تجویز پر بھی تبادلہ خیال کیا گیا، جبکہ سیاحت اور دیگر باہمی دلچسپی کے شعبوں میں تعاون بڑھانے پر اتفاق کیا گیا۔
پرتگال کے سفیر پالو ڈومینگوز نے وزیراعلیٰ پنجاب کو پرتگال کے دورے کی دعوت دیتے ہوئے ایران اور امریکہ کے درمیان مذاکرات میں پاکستان کے تعمیری سفارتی کردار کو سراہا۔ انہوں نے مشرق وسطیٰ میں امن و استحکام کے لیے پاکستان کی کوششوں کو قابلِ تحسین قرار دیا۔
سفیر نے پنجاب میں صحت کے شعبے میں ہونے والی پیش رفت، خصوصاً پہلے سرکاری کینسر اسپتال کے قیام پر وزیراعلیٰ مریم نواز شریف کو خراج تحسین پیش کیا اور کہا کہ پاکستانی تاجروں اور سرمایہ کاروں کے لیے پرتگال میں سازگار کاروباری ماحول فراہم کیا جائے گا۔
ملاقات کے دوران دونوں رہنماؤں نے اس عزم کا اظہار کیا کہ تجارت، سرمایہ کاری، تعلیم، ثقافت اور اقتصادی تعاون سمیت مختلف شعبوں میں دوطرفہ روابط کو مزید فروغ دیا جائے گا۔
