خلیج تعاون کونسل (جی سی سی) نے خلیجی ممالک اور تجارتی جہاز رانی کو نشانہ بنانے والے ایران کے حالیہ حملوں کی شدید مذمت کرتے ہوئے انہیں بین الاقوامی قوانین اور اقوام متحدہ کے چارٹر کی کھلی خلاف ورزی قرار دیا ہے۔
جی سی سی کے سیکرٹری جنرل جاسم البداوی نے اپنے بیان میں کہا کہ متحدہ عرب امارات، بحرین، عمان، قطر، کویت اور اردن سمیت خطے کے مختلف مقامات پر کیے گئے حملے نہ صرف علاقائی سلامتی بلکہ بین الاقوامی بحری تجارت اور جہاز رانی کی آزادی کے لیے بھی سنگین خطرہ ہیں۔
انہوں نے کہا کہ ایران کے اقدامات اقوام متحدہ کے چارٹر اور سلامتی کونسل کی متعلقہ قراردادوں کی روح کے منافی ہیں، جنہوں نے سمندری سلامتی اور بین الاقوامی قوانین کی پاسداری پر زور دیا ہے۔
سیکرٹری جنرل جاسم البداوی نے واضح کیا کہ خلیج تعاون کونسل اپنے تمام رکن ممالک اور متاثرہ ریاستوں کی سلامتی، خودمختاری اور عوام کے تحفظ کے لیے اٹھائے جانے والے دفاعی اقدامات کی مکمل حمایت کرتی ہے۔
انہوں نے عالمی برادری پر زور دیا کہ وہ خطے میں کشیدگی کم کرنے، سمندری راستوں کے تحفظ کو یقینی بنانے اور بین الاقوامی قوانین کی پاسداری کے لیے مؤثر اقدامات کرے تاکہ خلیج میں امن و استحکام برقرار رکھا جا سکے۔
