نیویارک: فیفا کے صدر جیانی انفانٹینو نے مستقبل میں 64 ٹیموں پر مشتمل فیفا ورلڈ کپ کے انعقاد کا عندیہ دیتے ہوئے کہا ہے کہ 2026 ورلڈ کپ کے بعد اس تجویز کا متعلقہ کمیٹیاں تفصیلی جائزہ لیں گی۔
میڈیا سے گفتگو کرتے ہوئے جیانی انفانٹینو نے کہا کہ 48 ٹیموں پر مشتمل ورلڈ کپ فارمیٹ سو فیصد کامیاب ثابت ہوا ہے اور اس میں تمام براعظموں کی ٹیموں نے بہترین کارکردگی کا مظاہرہ کیا۔
انہوں نے کہا کہ فیفا کا مقصد عالمی سطح پر فٹبال کو مزید فروغ دینا ہے، اس لیے چھوٹے ممالک کو بھی ورلڈ کپ میں شرکت کے مساوی مواقع ملنے چاہییں۔
فیفا صدر کے مطابق ورلڈ کپ صرف یورپ اور جنوبی امریکا تک محدود نہیں بلکہ پوری دنیا کا ایونٹ ہے، اور ہر ملک کو عالمی مقابلے میں شرکت کا خواب پورا کرنے کا حق حاصل ہونا چاہیے۔
انہوں نے مزید کہا کہ اگر چھوٹے ممالک کو عالمی سطح پر کھیلنے کے مواقع نہ ملے تو ان کی فٹبال ترقی متاثر ہوگی، جبکہ دنیا بھر میں کھیل کا معیار مسلسل بہتر ہو رہا ہے۔
امریکی صدر ڈونلڈ ٹرمپ سے اپنے تعلقات پر بات کرتے ہوئے انفانٹینو نے بتایا کہ ان کا تقریباً روزانہ رابطہ رہتا ہے اور وہ امید رکھتے ہیں کہ آئندہ ورلڈ کپ فائنل میں ٹرمپ کے ساتھ مل کر ٹرافی پیش کریں گے۔
انہوں نے کہا کہ میزبان ملک کے سربراہ اور فیفا صدر کی جانب سے مشترکہ طور پر ٹرافی پیش کرنے کی روایت کافی عرصے سے چلی آ رہی ہے۔
اگر فیفا مستقبل میں 64 ٹیموں پر مشتمل ورلڈ کپ کی منظوری دیتا ہے تو یہ عالمی فٹبال ٹورنامنٹ کی تاریخ کی سب سے بڑی توسیع ہوگی، جس سے مزید ممالک کو عالمی سطح پر اپنی صلاحیتیں دکھانے کا موقع ملے گا۔
