اسلام آباد: پاکستان کے برطانیہ میں نامزد ہائی کمشنر ٹیپو عثمان چوہدری سے نائب وزیراعظم و وزیر خارجہ سینیٹر محمد اسحاق ڈار سے ہفتہ کے روز ملاقات کی، جس میں پاکستان اور برطانیہ کے دوطرفہ تعلقات اور مختلف شعبوں میں تعاون کے فروغ پر تبادلہ خیال کیا گیا۔
دفتر خارجہ کے مطابق ملاقات کے دوران نائب وزیراعظم نے پاکستان اور برطانیہ کے درمیان مضبوط دوطرفہ تعلقات کی اہمیت پر زور دیتے ہوئے نامزد ہائی کمشنر کو ہدایت کی کہ وہ سیاسی، اقتصادی اور عوامی روابط کے شعبوں میں شراکت داری کو مزید وسعت دینے کے لیے بھرپور کوششیں کریں۔
اسحاق ڈار نے کہا کہ برطانیہ دنیا کی سب سے بڑی، متحرک اور فعال پاکستانی برادریوں میں سے ایک کا مسکن ہے، اس لیے وہاں مقیم پاکستانیوں کو معیاری اور بروقت قونصلر خدمات اور فلاحی معاونت کی فراہمی ہائی کمیشن کی اولین ترجیحات میں شامل ہونی چاہیے۔
نائب وزیراعظم نے وزارت خارجہ میں چیف آف پروٹوکول کی حیثیت سے ٹیپو عثمان چوہدری کی خدمات کو سراہتے ہوئے ان کی پیشہ ورانہ صلاحیتوں کی تعریف کی اور برطانیہ میں نئی سفارتی ذمہ داریوں کے لیے نیک خواہشات کا اظہار کیا۔
انہوں نے اس امید کا اظہار بھی کیا کہ نامزد ہائی کمشنر پاکستان اور برطانیہ کے درمیان سفارتی، تجارتی اور عوامی روابط کو مزید مضبوط بنانے میں مؤثر کردار ادا کریں گے۔
