اسلام آباد: اسلامی تعاون تنظیم (او آئی سی) کے رکن ممالک کے وفود نویں او آئی سی وزارتی کانفرنس برائے خواتین میں شرکت کے لیے اسلام آباد پہنچنا شروع ہو گئے ہیں۔ وزارتِ انسانی حقوق کے زیر اہتمام پاکستان کی میزبانی میں یہ دو روزہ اہم کانفرنس 12 اور 13 جولائی 2026 کو اسلام آباد میں منعقد ہوگی۔
وزارتِ انسانی حقوق کی جانب سے جاری اعلامیے کے مطابق کانفرنس کا موضوع "او آئی سی ممالک میں خواتین کا سماجی، معاشی اور سیاسی استحکام: چیلنجز اور آئندہ کا لائحۂ عمل” رکھا گیا ہے، جس میں رکن ممالک کے خواتین و خاندانی امور کے وزراء، اعلیٰ حکام، او آئی سی کے ذیلی اداروں، بین الاقوامی تنظیموں اور ترقیاتی شراکت داروں کے نمائندے شرکت کریں گے۔
کانفرنس کے دوران خواتین کے سماجی، معاشی اور سیاسی بااختیار بنانے، رکن ممالک کے درمیان تعاون کے فروغ، کامیاب قومی تجربات کے تبادلے اور مستقبل کے مشترکہ لائحۂ عمل پر تفصیلی غور کیا جائے گا۔
اسلام آباد انٹرنیشنل ایئرپورٹ پر آنے والے معزز وفود کا استقبال وزیرِ مملکت برائے قانون و انصاف بیرسٹر عقیل ملک، پارلیمانی سیکرٹری برائے انسانی حقوق صبا صادق، پارلیمانی سیکرٹری برائے قانون و انصاف فرح ناز اکبر سمیت وزارتِ انسانی حقوق، وزارتِ خارجہ اور دیگر متعلقہ اداروں کے سینئر حکام نے کیا۔
پاکستان کو اس اہم وزارتی کانفرنس کی میزبانی حاصل ہونا او آئی سی کے مقاصد سے اس کی وابستگی اور خواتین کے حقوق، وقار اور بااختیار بنانے کے لیے رکن ممالک کے درمیان تعاون کو فروغ دینے کے عزم کا اظہار قرار دیا جا رہا ہے۔
کانفرنس کے دوران وفاقی وزیر برائے قانون، انصاف و انسانی حقوق سینیٹر اعظم نذیر تارڑ نویں او آئی سی وزارتی کانفرنس برائے خواتین کے چیئرمین کی حیثیت سے ذمہ داریاں سنبھالیں گے۔ پاکستان اس فورم کی صدارت کرتے ہوئے رکن ممالک کے درمیان اتفاقِ رائے، مشترکہ حکمت عملی اور عملی تعاون کے فروغ میں قائدانہ کردار ادا کرے گا۔
اجلاسوں میں خواتین کے استحکام سے متعلق پیش رفت کا جائزہ لینے کے ساتھ ساتھ بہترین پالیسیوں اور کامیاب قومی اقدامات کا تبادلہ بھی کیا جائے گا تاکہ او آئی سی ممالک کے درمیان مؤثر تعاون کو مزید مضبوط بنایا جا سکے۔
حکومتِ پاکستان نے تمام بین الاقوامی وفود کا خیرمقدم کرتے ہوئے ان کے لیے خوشگوار قیام اور کانفرنس کی کامیابی کے لیے نیک تمناؤں کا اظہار کیا ہے۔
