اسلام آباد: وفاقی وزارتِ اطلاعات و نشریات نے آزاد جموں و کشمیر سے متعلق شائع ہونے والی ایک رپورٹ پر بی بی سی اردو کے خلاف سخت احتجاج ریکارڈ کراتے ہوئے باضابطہ شکایت درج کرا دی ہے۔
وزارتِ اطلاعات و نشریات کی جانب سے جاری بیان میں کہا گیا ہے کہ متعلقہ رپورٹ غیر مصدقہ اور بے بنیاد الزامات پر مبنی تھی، جس میں سرکاری مؤقف اور دستیاب حقائق کو نظر انداز کیا گیا۔ وزارت کے مطابق خبر میں پیش کیے گئے دعوے مستند شواہد سے ثابت نہیں تھے، جس کے باعث رپورٹ صحافتی معیار پر پوری نہیں اترتی۔
بیان میں کہا گیا کہ بی بی سی اردو کی جانب سے غیر مصدقہ اطلاعات کی اشاعت کا یہ پہلا واقعہ نہیں، بلکہ ایسے دعوؤں کی بار بار اشاعت ایک تشویشناک رجحان بنتی جا رہی ہے، جس کی اصلاح کے لیے مؤثر اقدامات ضروری ہیں۔
وزارتِ اطلاعات نے مؤقف اختیار کیا کہ آزاد جموں و کشمیر میں راستوں کی بندش سے متعلق شائع کی گئی خبر حقائق کے منافی تھی۔ بیان کے مطابق حکومتِ آزاد جموں و کشمیر بھی مذکورہ رپورٹ میں کیے گئے دعوؤں کو مسترد کر چکی ہے۔
وفاقی وزارت نے بین الاقوامی ذرائع ابلاغ پر زور دیا کہ وہ صحافتی اصولوں اور پیشہ ورانہ ذمہ داریوں کو مدنظر رکھتے ہوئے غیر مصدقہ، گمراہ کن اور بے بنیاد معلومات کی اشاعت سے گریز کریں اور کسی بھی حساس معاملے پر خبر نشر کرنے سے قبل تمام متعلقہ مؤقف اور حقائق کی تصدیق یقینی بنائیں۔
وزارت نے واضح کیا کہ پاکستان ذمہ دارانہ صحافت، درست معلومات کی فراہمی اور پیشہ ورانہ صحافتی معیارات کی پاسداری کو انتہائی اہمیت دیتا ہے اور توقع رکھتا ہے کہ بین الاقوامی میڈیا ادارے بھی انہی اصولوں پر عمل کریں گے۔
