اسلام آباد: ایرانی صدر مسعود پزشکیان نے پاکستان کی امن کے فروغ کے لیے کوششوں کو سراہتے ہوئے کہا ہے کہ ایران اور پاکستان اپنی امنگوں، امیدوں اور علاقائی استحکام کے وژن میں گہری مماثلت رکھتے ہیں۔
سوشل میڈیا پر جاری اپنے پیغام میں ایرانی صدر نے کہا کہ خطے میں امن، استحکام اور تعاون کے فروغ کے لیے پاکستان کی انتھک سفارتی کاوشیں اس ملک کی بھرپور تہذیبی اور ثقافتی روایات کا عکاس ہیں۔
مسعود پزشکیان نے پاکستان کی جانب سے علاقائی کشیدگی کم کرنے اور مذاکرات کے ذریعے مسائل کے حل کے لیے کی جانے والی ثالثی کی کوششوں کو بھی سراہا۔ انہوں نے کہا کہ اپنے حالیہ دورۂ پاکستان کے دوران انہوں نے پاکستانی قیادت کے ساتھ دوطرفہ تعلقات کے فروغ اور باہمی تعاون کے مختلف پہلوؤں پر تفصیلی تبادلہ خیال کیا۔
ایرانی صدر کے مطابق ملاقاتوں میں آصف علی زرداری، شہبازشریف اور سید عاصم منیر کے ساتھ سیاسی، اقتصادی، تجارتی اور علاقائی امور پر گفتگو ہوئی، جس کا مقصد دونوں برادر ممالک کے درمیان تعلقات کو مزید وسعت دینا تھا۔
انہوں نے اس امید کا اظہار کیا کہ ایران اور پاکستان باہمی احترام، مشترکہ مفادات اور قریبی تعاون کی بنیاد پر اپنے تعلقات کو نئی بلندیوں تک لے جائیں گے اور خطے میں امن و خوشحالی کے فروغ کے لیے مشترکہ کردار ادا کرتے رہیں گے۔
تجزیہ کاروں کے مطابق ایرانی صدر کا بیان ایسے وقت میں سامنے آیا ہے جب خطے میں مختلف جغرافیائی و سیاسی چیلنجز موجود ہیں اور پاکستان و ایران دونوں ممالک علاقائی استحکام اور سفارتی رابطوں کو مضبوط بنانے پر زور دے رہے ہیں۔
