امریکی محکمہ خزانہ نے اعلان کیا ہے کہ ایران کے خلاف مبینہ پابندیوں کی خلاف ورزیوں کے معاملے پر بھارت کی بڑی کمپنی اڈانی انٹرپرائزر سے 275 ملین ڈالر کا تصفیہ طے پا گیا ہے۔
امریکی محکمہ خزانہ کے دفتر برائے غیر ملکی اثاثہ جات کنٹرول کی جانب سے جاری بیان میں کہا گیا ہے کہ اڈانی انٹرپرائزز نے ایران سے متعلق امریکی پابندیوں کی 32 مبینہ خلاف ورزیاں کیں، جن کے نتیجے میں کمپنی نے اپنی ممکنہ قانونی ذمہ داری تسلیم کرتے ہوئے مالی تصفیہ کرنے پر اتفاق کیا۔
بیان کے مطابق یہ تصفیہ ایران پر عائد امریکی اقتصادی پابندیوں کی مبینہ خلاف ورزیوں سے متعلق تحقیقات کے بعد طے پایا، جس میں کمپنی کے بین الاقوامی تجارتی معاملات کا تفصیلی جائزہ لیا گیا۔
تجزیہ کاروں کے مطابق یہ معاملہ عالمی سطح پر توانائی اور تجارتی کمپنیوں کیلئے امریکی پابندیوں کے بڑھتے ہوئے اثرات کی ایک اور مثال ہے، جہاں بڑی ملٹی نیشنل کمپنیاں بھی ریگولیٹری کارروائیوں کی زد میں آ رہی ہیں۔
امریکی حکام کے مطابق پابندیوں پر عملدرآمد عالمی مالیاتی نظام کی شفافیت اور امریکی قوانین کی تعمیل یقینی بنانے کیلئے ضروری ہے، جبکہ اس طرح کے اقدامات مستقبل میں بھی جاری رہنے کا امکان ہے۔
