بیجنگ: چین کی پیپلز لبریشن آرمی (پی ایل اے) نیوی نے بحرالکاہل کے بین الاقوامی سمندری علاقے میں آبدوز سے اسٹریٹجک میزائل کا کامیاب تجربہ انجام دینے کا اعلان کیا ہے۔
سرکاری خبر رساں ادارے شنہوا کے مطابق چینی بحریہ نے بتایا کہ اس کی ایک اسٹریٹجک جوہری آبدوز نے پیر کی دوپہر بحرالکاہل کے متعلقہ بین الاقوامی سمندری علاقے کی جانب فرضی وارہیڈ سے لیس اسٹریٹجک میزائل داغا۔
بحریہ کے بیان کے مطابق میزائل نے اپنی تمام تکنیکی پرواز کامیابی سے مکمل کی اور منصوبہ بندی کے مطابق مقررہ سمندری ہدف پر جا گرا، جس سے تجربے کو مکمل طور پر کامیاب قرار دیا گیا۔
پی ایل اے نیوی نے مزید کہا کہ یہ تجربہ معمول کی فوجی تربیتی سرگرمیوں کا حصہ تھا اور اس کا مقصد بحری دفاعی صلاحیتوں اور اسٹریٹجک ڈیٹرنس (Deterrence) کی جانچ کرنا تھا۔
چینی حکام نے اس تجربے کی مزید تکنیکی تفصیلات، میزائل کی نوعیت یا اس کی رینج سے متعلق معلومات جاری نہیں کیں، تاہم دفاعی ماہرین کے مطابق اس قسم کے تجربات چین کی بحری جوہری صلاحیتوں کو مزید مضبوط بنانے کی حکمت عملی کا حصہ سمجھے جاتے ہیں۔
یہ تجربہ ایسے وقت میں سامنے آیا ہے جب ایشیا بحرالکاہل کے خطے میں سکیورٹی اور عسکری سرگرمیوں پر عالمی توجہ مسلسل مرکوز ہے۔
