سعودی وزارت دفاع نے کہا ہے کہ اس نے اپنی فضائی حدود میں داخل ہونے والے تین ڈرونز کو بروقت کارروائی کرتے ہوئے ناکارہ بنا دیا ہے، جن کے بارے میں دعویٰ کیا گیا ہے کہ وہ عراق کی فضائی حدود سے داخل ہوئے تھے۔
بین الاقوامی خبر رساں ادارے کے مطابق سعودی عرب کی وزارتِ دفاع نے بیان میں کہا ہے کہ مملکت کے دفاعی نظام نے تین مشتبہ ڈرونز کا سراغ لگا کر انہیں اپنی فضائی حدود میں داخل ہوتے ہی روک دیا۔
سعودی وزارت دفاع کے مطابق یہ ڈرونز عراقی فضائی حدود سے سعودی عرب کی سمت آئے، تاہم بروقت کارروائی کے ذریعے انہیں ہدف تک پہنچنے سے پہلے ہی تباہ کر دیا گیا۔
بیان میں مزید کہا گیا کہ سعودی عرب اپنی خودمختاری اور قومی سلامتی کے تحفظ کے لیے ہر ممکن آپریشنل اقدامات جاری رکھے گا اور کسی بھی خلاف ورزی کا سخت جواب دیا جائے گا۔
حکام نے واقعے کی مزید تفصیلات یا ممکنہ نقصانات کے بارے میں فوری طور پر کوئی وضاحت جاری نہیں کی، جبکہ اس معاملے کی تحقیقات جاری ہیں۔
یہ پیش رفت ایسے وقت سامنے آئی ہے جب خطے میں ڈرون حملوں اور فضائی سکیورٹی کے خدشات میں اضافہ دیکھا جا رہا ہے، اور خلیجی ممالک اپنی دفاعی تیاریوں کو مزید مضبوط کر رہے ہیں۔
