بھارت کی تامل فلم انڈسٹری کے معروف اور سینئر فلم پروڈیوسر کے راجن نے دریا میں چھلانگ لگا کر خودکشی کر لی۔
بھارتی میڈیا رپورٹس کے مطابق 85 سالہ پروڈیوسر نے چنئی کے آدیار دریا میں چھلانگ لگائی۔ پولیس کے مطابق واقعہ اس وقت پیش آیا جب وہ آدیار پل عبور کر رہے تھے اور اچانک اپنے ڈرائیور کو گاڑی روکنے کی ہدایت دی۔
رپورٹس کے مطابق گاڑی رکنے کے بعد کے راجن فوراً باہر نکلے اور دریا میں چھلانگ لگا دی۔ ڈرائیور نے فوری طور پر ریسکیو حکام کو اطلاع دی، جس کے بعد امدادی کارروائیاں شروع کی گئیں۔
بعد ازاں ریسکیو ٹیموں نے ان کی لاش دریا سے نکال کر پوسٹ مارٹم کے لیے منتقل کر دی۔ پولیس کا کہنا ہے کہ واقعے کی تحقیقات جاری ہیں اور مختلف پہلوؤں کا جائزہ لیا جا رہا ہے۔
بھارتی میڈیا کے مطابق کے راجن نے 1980 کی دہائی میں تامل فلم انڈسٹری میں بطور پروڈیوسر اپنی شناخت بنائی۔ انہوں نے متعدد فلمیں پروڈیوس کرنے کے ساتھ ساتھ بعض فلموں کی ہدایت کاری بھی کی تھی۔
وہ تامل فلم ڈسٹری بیوٹرز کی ایک اہم ایسوسی ایشن کے صدر بھی رہ چکے تھے اور فلمی حلقوں میں ایک بااثر شخصیت سمجھے جاتے تھے۔
ان کی وفات کی خبر سامنے آنے کے بعد تامل فلم انڈسٹری سے وابستہ شخصیات اور مداحوں کی جانب سے گہرے دکھ اور افسوس کا اظہار کیا جا رہا ہے۔
