جکارتہ: انڈونیشیا کے مادورا جزیرے کے قریب ایک مسافر فیری میں آگ لگنے کے نتیجے میں کم از کم 5 افراد ہلاک جبکہ 41 افراد لاپتہ ہو گئے ہیں۔ انڈونیشیا کی قومی تلاش و بچاؤ ایجنسی کے مطابق ریسکیو آپریشن تاحال جاری ہے۔
رائٹرز کے مطابق حادثے کے وقت فیری میں 271 مسافر اور عملے کے ارکان سوار تھے۔ حکام کا کہنا ہے کہ اب تک 225 افراد کو بحفاظت بچا لیا گیا ہے جبکہ لاپتہ افراد کی تلاش کے لیے امدادی ٹیمیں مسلسل کارروائیاں کر رہی ہیں۔
بیان کے مطابق یہ فیری مشرقی جاوا کے شہر سورابایا سے جنوبی سولاویسی کے شہر مکاسار جا رہی تھی کہ اتوار کی صبح سفر کے دوران اس میں اچانک آگ بھڑک اٹھی۔
ابتدائی اطلاعات کے مطابق فی الحال آگ لگنے کی وجہ معلوم نہیں ہو سکی، تاہم متعلقہ حکام نے واقعے کی تحقیقات شروع کر دی ہیں تاکہ حادثے کی وجوہات کا تعین کیا جا سکے۔
حکام کے مطابق امدادی کارروائیوں میں بحریہ، سرچ اینڈ ریسکیو اداروں اور مقامی حکام کی ٹیمیں حصہ لے رہی ہیں، جبکہ لاپتہ افراد کی تلاش کے لیے سمندر میں وسیع پیمانے پر آپریشن جاری ہے۔
واضح رہے کہ مادورا جزیرہ انڈونیشیا کے جاوا کے شمال مشرقی ساحل کے قریب واقع ہے اور اس سمندری راستے پر مسافر اور تجارتی جہازوں کی آمدورفت معمول کا حصہ ہے۔
