لاہور: پاکستان کے اسٹار فاسٹ بولر شاہین شاہ آفریدی ذاتی وجوہات کی بنا پر لنکا پریمیئر لیگ (LPL) ادھوری چھوڑ کر وطن واپس آ گئے ہیں۔
ذرائع کے مطابق ایونٹ کے دوران کینڈی رائلز کے ساتھ ان کا ایک انتظامی تنازع بھی سامنے آیا تھا۔ 19 جولائی کو کولمبو کیپٹلز کے خلاف میچ میں شاہین آفریدی کو امپیکٹ پلیئر کے طور پر میدان میں اتارنے کی منصوبہ بندی کی گئی، تاہم آفیشل ٹیم شیٹ میں ان کا نام شامل نہیں تھا، جس پر انہوں نے ناراضی کا اظہار کیا۔
بعد ازاں کینڈی رائلز کی انتظامیہ نے اس معاملے پر معذرت کی، جس کے بعد شاہین آفریدی ٹیم کے آئندہ میچز میں دوبارہ شریک ہوئے اور اپنی کارکردگی جاری رکھی۔
شاہین شاہ آفریدی نے لنکا پریمیئر لیگ کے موجودہ سیزن میں 6 میچز کھیلتے ہوئے 7 وکٹیں حاصل کیں اور اپنی ٹیم کے اہم باؤلرز میں شامل رہے۔
ان کی وطن واپسی کی سرکاری وجہ ذاتی وجوہات بتائی گئی ہے، جبکہ اس حوالے سے مزید تفصیلات جاری نہیں کی گئیں۔
