پاکستان اور بنگلہ دیش کے درمیان تجارتی تعاون کو فروغ دینے کی جانب ایک اہم پیش رفت سامنے آئی ہے، جہاں ایم جی جے ڈبلیو آٹوموبائل پاکستان (MG JW Automobile Pakistan) اور بنگلہ دیش کے RANCON گروپ کے درمیان گاڑیوں کی برآمد کے لیے مفاہمت کی یادداشت (MoU) پر دستخط کیے گئے ہیں۔
وزارت صنعت و پیداوار، حکومت پاکستان کے مطابق اس معاہدے کے تحت رواں سال بنگلہ دیش کو 100 گاڑیاں برآمد کی جائیں گی، جبکہ آئندہ چار برسوں میں مجموعی برآمدات 5,800 گاڑیوں تک پہنچنے کی توقع ہے۔
حکام کے مطابق اس شراکت داری سے بنگلہ دیش کی آٹوموبائل مارکیٹ میں گاڑیوں کی دستیاب اقسام میں اضافہ ہوگا، صحت مند مسابقت کو فروغ ملے گا اور صارفین کو مناسب قیمتوں پر مزید معیاری آپشنز میسر آئیں گے۔
اس موقع پر RANCON گروپ کے ایگزیکٹو ڈائریکٹر محمد مستفیض الرشید بھوئیاں نے کہا کہ یہ معاہدہ بنگلہ دیش کی آٹوموبائل مارکیٹ میں مثبت مقابلے کا آغاز ثابت ہوگا، جبکہ صارفین کو پاکستان میں تیار کی جانے والی اعلیٰ معیار کی گاڑیاں دستیاب ہوں گی۔
وزیراعظم کے معاون خصوصی برائے صنعت و پیداوار ہارون اختر خان نے معاہدے کا خیرمقدم کرتے ہوئے کہا کہ اس نوعیت کی شراکت داریاں پاکستان اور بنگلہ دیش کے درمیان تجارتی اور اقتصادی تعلقات کو مزید مستحکم کریں گی۔ ان کے مطابق اس تعاون سے دونوں ممالک کے نجی شعبوں کے درمیان کاروباری روابط میں بھی اضافہ ہوگا اور سرمایہ کاری کے نئے مواقع پیدا ہوں گے۔
تقریب میں دونوں کمپنیوں کے اعلیٰ حکام، حکومتی نمائندوں اور کاروباری شخصیات نے شرکت کی، جبکہ اس معاہدے کو پاکستان کی آٹو انڈسٹری کے لیے برآمدی منڈیوں میں توسیع کی جانب ایک اہم سنگ میل قرار دیا جا رہا ہے۔
