تاشقند: ازبکستان میں پاکستان کے نامزد سفیر محمد مدثر ٹیپو نے صدر شوکت مرزیوئیف کو باضابطہ طور پر اپنی سفارتی اسناد پیش کر دیں۔ اس موقع پر دونوں ممالک کے درمیان تجارت، سرمایہ کاری، سیاحت اور علاقائی روابط سمیت مختلف شعبوں میں تعاون کو مزید فروغ دینے کے عزم کا اعادہ کیا گیا۔
اسناد پیش کرنے کی تقریب کے دوران سفیر محمد مدثر ٹیپو نے ازبک صدر کو صدر آصف علی زرداری اور وزیراعظم شہباز شریف کی جانب سے نیک تمناؤں اور تہنیتی پیغامات بھی پہنچائے۔
پاکستانی سفیر نے اس موقع پر کہا کہ پاکستان، ازبکستان کے ساتھ دوطرفہ تعلقات کو مزید مضبوط بنانے، اقتصادی شراکت داری کو وسعت دینے، سرمایہ کاری کے مواقع بڑھانے، سیاحت کے فروغ اور علاقائی رابطوں کے منصوبوں میں تعاون کو نئی جہت دینے کے لیے پُرعزم ہے۔
ازبکستان کے صدر شوکت مرزیوئیف نے علاقائی امن، استحکام اور سفارتی مکالمے کے فروغ کے لیے پاکستان کی کوششوں کو سراہتے ہوئے کہا کہ پاکستان نے خطے میں مثبت اور تعمیری کردار ادا کیا ہے، جسے ازبکستان قدر کی نگاہ سے دیکھتا ہے۔
دونوں رہنماؤں نے اس بات پر اتفاق کیا کہ حالیہ برسوں میں پاکستان اور ازبکستان کے تعلقات میں نمایاں پیش رفت ہوئی ہے اور مستقبل میں بھی تجارت، سرمایہ کاری، ٹرانزٹ، علاقائی رابطوں اور دیگر شعبوں میں تعاون کو مزید فروغ دینے کے لیے مشترکہ کوششیں جاری رکھی جائیں گی۔
پاکستان اور ازبکستان وسطی و جنوبی ایشیا کے درمیان اقتصادی روابط، تجارتی راہداریوں اور علاقائی تعاون کے مختلف منصوبوں پر قریبی اشتراک کے خواہاں ہیں، جس سے دونوں ممالک کے درمیان دوطرفہ تعلقات مزید مستحکم ہونے کی توقع ہے۔
