تاروبا: ویسٹ انڈیز نے پہلے ٹیسٹ میچ میں پاکستان کو 90 رنز سے شکست دے کر دو میچوں کی سیریز میں 1-0 کی برتری حاصل کر لی۔ برائن لارا کرکٹ اکیڈمی، تاروبا میں کھیلے گئے میچ میں قومی ٹیم 211 رنز کے ہدف کے تعاقب میں صرف 120 رنز پر ڈھیر ہوگئی۔
پاکستان کی دوسری اننگز شدید مشکلات کا شکار رہی اور آٹھ بلے باز ڈبل فیگر میں بھی داخل نہ ہو سکے۔ کپتان بابر اعظم نے مزاحمت کرتے ہوئے ناقابلِ شکست 58 رنز بنائے، جبکہ محمد عباس 23 رنز کے ساتھ دوسرے نمایاں بلے باز رہے۔
دیگر بلے بازوں میں محمد رضوان 11 رنز بنا سکے، جبکہ سلمان علی آغا، عامر جمال اور محمد علی کھاتہ کھولے بغیر آؤٹ ہوگئے۔ امام الحق، اذان اویس اور شان مسعود نے تین، تین رنز بنائے، خرم شہزاد 4 جبکہ ٹیسٹ ڈیبیو کرنے والے علی عثمان صرف 2 رنز ہی بنا سکے۔
اس سے قبل ویسٹ انڈیز نے اپنی دوسری اننگز میں 181 رنز بنائے تھے، جس کے بعد پاکستان کو فتح کے لیے 211 رنز کا ہدف ملا۔ میزبان ٹیم کو پہلی اننگز میں 29 رنز کی برتری حاصل تھی۔ دوسری اننگز میں شمار جوزف نے 38، ٹیگنارائن چندرپال نے 35، جسٹن گریوز نے 20 اور کیمار روچ نے 18 رنز اسکور کیے۔
پاکستان نے پہلی اننگز میں 282 رنز بنائے تھے، تاہم ویسٹ انڈیز کے فاسٹ بولر جیڈن سیلز نے شاندار بولنگ کا مظاہرہ کرتے ہوئے پانچ وکٹیں حاصل کیں اور میچ میں اہم کردار ادا کیا۔
یہ شکست بیرونِ ملک ٹیسٹ کرکٹ میں پاکستان کی مسلسل آٹھویں ناکامی ہے، جس کے بعد قومی ٹیم پر سیریز کے دوسرے اور آخری ٹیسٹ میں کم بیک کرنے کا دباؤ مزید بڑھ گیا ہے۔
