ٹوکیو: جاپان کے جنوبی صوبے کماموٹو میں 7.1 شدت کے طاقتور زلزلے کے بعد ایک شاپنگ مال میں دھماکے اور عمارت کو نقصان پہنچنے کے نتیجے میں کم از کم دو افراد ہلاک جبکہ متعدد زخمی ہوگئے۔ حکام کے مطابق زلزلے سے علاقے میں بڑے پیمانے پر تباہی پھیلی، ہزاروں گھروں کی بجلی منقطع ہوگئی اور کئی سڑکیں و پل متاثر ہوئے۔
صوبائی حکومت کے مطابق امدادی ٹیموں نے رات بھر جاری کارروائیوں کے دوران ایون مال کماموٹو سے آٹھ افراد کو نکالا، جہاں زلزلے کے فوراً بعد دھماکا ہوا تھا۔ نکالے گئے افراد میں بیس برس کی دو خواتین جان کی بازی ہار گئیں، جبکہ ایک اور شخص کی حالت تشویشناک بتائی گئی۔ پانچ دیگر زخمیوں کو طبی امداد فراہم کی جا رہی ہے۔
فائر ریسکیو، پولیس اور جاپان کی سیلف ڈیفنس فورسز کے اہلکار مشترکہ طور پر متاثرہ عمارت میں سرچ اینڈ ریسکیو آپریشن جاری رکھے ہوئے ہیں۔ امدادی ٹیمیں ان مقامات پر خصوصی توجہ دے رہی ہیں جہاں سے لوگوں کی مدد کے لیے کالیں موصول ہوئیں۔
جاپانی وزیر اعظم سانائے تاکائیچی نے ٹوکیو میں میڈیا سے گفتگو کرتے ہوئے کہا کہ حکام نقصان کا مکمل تخمینہ لگا رہے ہیں۔ ان کے مطابق بعض علاقوں میں آگ لگنے، بجلی کی طویل بندش، سڑکوں اور پلوں کو نقصان اور متعدد عمارتوں کے متاثر ہونے کی اطلاعات موصول ہوئی ہیں۔
حکام نے آفٹر شاکس کے خدشے کے پیش نظر تقریباً تین لاکھ افراد کو محفوظ مقامات اور انخلائی مراکز منتقل ہونے کی ہدایت کی ہے، جبکہ جنوب مغربی جزیرے کیوشو میں آفٹر شاکس کا سلسلہ بھی جاری ہے۔
یاد رہے کہ کماموٹو کا علاقہ ماضی میں بھی شدید زلزلوں کا سامنا کر چکا ہے، اور حالیہ زلزلے کے بعد حکام نے عوام سے احتیاطی تدابیر اختیار کرنے اور سرکاری ہدایات پر عمل کرنے کی اپیل کی ہے۔
