راولاکوٹ: آزاد جموں و کشمیر قانون ساز اسمبلی کے پہلے مرحلے کے انتخابات کے بعد راولاکوٹ میں کشیدگی اس وقت بڑھ گئی جب کالعدم قرار دی گئی جموں کشمیر جوائنٹ عوامی ایکشن کمیٹی کے لانگ مارچ کے شرکاء کو شہر میں داخل ہونے سے روک دیا گیا، جس کے بعد مختلف مقامات پر مظاہرین اور سیکیورٹی فورسز کے درمیان تصادم پیش آیا۔
سرکاری حکام کے مطابق لانگ مارچ کے شرکاء کو راولاکوٹ شہر کے داخلی راستوں پر روکنے کے لیے سیکیورٹی کے سخت انتظامات کیے گئے تھے۔ مظاہرین کو منتشر کرنے کے لیے آنسو گیس کا استعمال بھی کیا گیا، جبکہ بعض مقامات پر جھڑپیں شدت اختیار کر گئیں۔
پولیس کے مطابق مظاہرین کی جانب سے فائرنگ، تشدد اور آتش زنی کے واقعات پیش آئے، جن میں رینجرز کے سپاہی علی رضا شہید جبکہ کم از کم تین پولیس اہلکار زخمی ہوگئے۔ پولیس اور رینجرز کی ایک، ایک گاڑی کو بھی نذرِ آتش کیے جانے کی اطلاع دی گئی ہے۔
ضلعی انتظامیہ کے مطابق دریک اور سنگولہ سمیت مختلف مقامات سے ہزاروں مظاہرین راولاکوٹ کی جانب مارچ کر رہے تھے۔ انتظامیہ کا مؤقف ہے کہ بعض مظاہرین نے قانون نافذ کرنے والے اہلکاروں پر فائرنگ کی، جس کے جواب میں جوابی کارروائی کی گئی، جبکہ دیگر مظاہرین کو روکنے کے لیے آنسو گیس کا استعمال کیا گیا۔
دوسری جانب جوائنٹ عوامی ایکشن کمیٹی کی کور کمیٹی کے رکن عابد شاہین نے الزام عائد کیا کہ سیکیورٹی فورسز نے پُرامن لانگ مارچ کے شرکاء پر بلااشتعال فائرنگ کی، جس کے نتیجے میں ان کے بقول کم از کم پانچ افراد زخمی ہوئے۔ انہوں نے اعلان کیا کہ لانگ مارچ جاری رہے گا اور مظاہرین مظفرآباد پہنچنے کی کوشش کریں گے۔
واضح رہے کہ کالعدم جوائنٹ عوامی ایکشن کمیٹی نے آزاد کشمیر انتخابات کے بائیکاٹ کا اعلان کیا تھا، جبکہ پاکستان تحریک انصاف نے بھی گزشتہ ماہ کمیٹی سے اظہارِ یکجہتی کرتے ہوئے انتخابات میں حصہ نہ لینے کا فیصلہ کیا تھا۔
ادھر سیکریٹری الیکشن کمیشن راجہ محمد شکیل اور چیف سیکریٹری آزاد کشمیر نے مشترکہ پریس کانفرنس میں خبردار کیا کہ پولنگ کے عمل میں رکاوٹ ڈالنے یا امن و امان خراب کرنے کی ہر کوشش کے خلاف سخت قانونی کارروائی کی جائے گی۔ انہوں نے عوام پر زور دیا کہ وہ سوشل میڈیا پر پھیلائے جانے والے غیر مصدقہ پروپیگنڈے سے گریز کریں اور جمہوری عمل پر اعتماد کا اظہار کریں۔
پولیس کے اعلامیے میں کہا گیا ہے کہ ریاست کی عملداری ہر صورت برقرار رکھی جائے گی، جبکہ تشدد، آتش زنی اور سرکاری املاک پر حملوں میں ملوث افراد کے خلاف قانون کے مطابق کارروائی کی جائے گی۔ سیکیورٹی اداروں نے عوام سے اپیل کی ہے کہ وہ صرف مصدقہ اطلاعات پر اعتماد کریں اور امن و امان برقرار رکھنے میں تعاون کریں۔
آزاد کشمیر قانون ساز اسمبلی کے انتخابی شیڈول کے مطابق پہلے مرحلے کے بعد دوسرے مرحلے کی پولنگ 2 اگست کو مظفرآباد ڈویژن جبکہ تیسرے مرحلے کی پولنگ 10 اگست کو پونچھ ڈویژن میں ہوگی۔
