آزاد جموں و کشمیر قانون ساز اسمبلی کے انتخابات کے پہلے مرحلے کے غیرحتمی اور غیرسرکاری نتائج موصول ہونا شروع ہوگئے ہیں، جن کے مطابق ابتدائی مرحلے میں پاکستان مسلم لیگ (ن) کو برتری حاصل ہے جبکہ پاکستان پیپلز پارٹی بھی متعدد حلقوں میں مضبوط پوزیشن میں ہے۔
میرپور ڈویژن کے تین اضلاع میرپور، کوٹلی اور بھمبر کی 13 نشستوں پر ہونے والی پولنگ کے بعد اب تک سامنے آنے والے مکمل غیرحتمی نتائج کے مطابق مسلم لیگ (ن) پانچ نشستوں پر کامیابی حاصل کرچکی ہے جبکہ پاکستان پیپلز پارٹی دو نشستیں جیتنے میں کامیاب رہی ہے۔ کئی دیگر حلقوں میں ووٹوں کی گنتی جاری ہے جہاں دونوں بڑی جماعتوں کے امیدواروں کے درمیان سخت مقابلہ دیکھنے میں آ رہا ہے۔
موصولہ مکمل نتائج کے مطابق حلقہ ایل اے-1 میرپور میں مسلم لیگ (ن) کے اظہر صادق، ایل اے-4 میرپور میں چوہدری رخسار احمد، ایل اے-7 بھمبر میں چوہدری طارق فاروق، ایل اے-9 کوٹلی میں عمیر نعیم اور ایل اے-13 کوٹلی میں راجہ ایاز احمد خان کامیاب قرار پائے ہیں۔
دوسری جانب پاکستان پیپلز پارٹی نے ایل اے-2 میرپور میں قاسم مجید اور ایل اے-3 میرپور میں چوہدری یاسر سلطان کی کامیابی کے ذریعے دو نشستیں اپنے نام کیں۔
ادھر کئی حلقوں میں ووٹوں کی گنتی کا عمل جاری ہے۔ غیرسرکاری نتائج کے مطابق ایل اے-5 اور ایل اے-6 میں مسلم لیگ (ن) کو برتری حاصل ہے، جبکہ ایل اے-8، ایل اے-10، ایل اے-11 اور ایل اے-12 میں پاکستان پیپلز پارٹی کے امیدوار آگے چل رہے ہیں۔
الیکشن کمیشن کے مطابق پہلے مرحلے میں میرپور ڈویژن کے 13 حلقوں میں مجموعی طور پر 14 لاکھ سے زائد رجسٹرڈ ووٹرز نے حق رائے دہی استعمال کیا، جبکہ پولنگ کے لیے 2 ہزار 454 پولنگ اسٹیشن قائم کیے گئے تھے۔ انتخابات کے دوران سیکیورٹی کے سخت انتظامات کیے گئے اور پولیس، رینجرز سمیت دیگر قانون نافذ کرنے والے اداروں کے اہلکار تعینات رہے۔
چیف الیکشن کمشنر جسٹس (ر) غلام مصطفیٰ مغل نے کہا کہ چند واقعات کے باوجود مجموعی طور پر پولنگ کا عمل پرامن رہا اور باقی نتائج جلد جاری کر دیے جائیں گے۔ انہوں نے بتایا کہ آزاد کشمیر انتخابات کے دوسرے مرحلے میں مظفرآباد ڈویژن میں 2 اگست جبکہ پونچھ ڈویژن میں 10 اگست کو پولنگ ہوگی۔
