گلگت: گلگت بلتستان کے نومنتخب وزیراعلیٰ امجد حسین نے کہا ہے کہ قدرتی وسائل سے مالا مال خطے میں توانائی کا بحران ایک بڑا المیہ ہے، جبکہ صوبائی کابینہ کی تشکیل کا حتمی فیصلہ چیئرمین پاکستان پیپلز پارٹی بلاول بھٹو زرداری کریں گے۔
خصوصی انٹرویو میں وزیراعلیٰ امجد حسین نے کہا کہ گلگت بلتستان میں توانائی، بے روزگاری اور مواصلاتی نظام سب سے بڑے مسائل ہیں، جن کے حل کے لیے حکومت ترجیحی بنیادوں پر نئے توانائی منصوبے شروع کرے گی۔
انہوں نے کہا کہ سرکاری اداروں میں روزگار کے نئے مواقع پیدا کیے جائیں گے، جبکہ نجی شعبے کو بھی فعال بنانے کے لیے اقدامات کیے جائیں گے۔ ان کا کہنا تھا کہ چین کے ساتھ تجارتی مواقع سے بھرپور فائدہ اٹھایا جائے گا اور پاکستان بھر کے سرمایہ کاروں کو گلگت بلتستان میں سرمایہ کاری کی دعوت دی جائے گی۔
وزیراعلیٰ نے کابینہ کی تشکیل سے متعلق بتایا کہ گلگت بلتستان کی نئی کابینہ کے ارکان کا فیصلہ پاکستان پیپلز پارٹی کے چیئرمین بلاول بھٹو زرداری کریں گے۔
امجد حسین کا کہنا تھا کہ گلگت بلتستان کے عوام نے پاکستان پیپلز پارٹی اور بلاول بھٹو زرداری پر اعتماد کا اظہار کیا ہے۔ انہوں نے کہا کہ بلاول بھٹو زرداری نے خود انتخابی مہم میں بھرپور حصہ لیا، اس لیے عوام کی توقعات پر پورا اترنا حکومت کی ذمہ داری ہے۔
انہوں نے مزید کہا کہ گزشتہ کئی دہائیوں میں گلگت بلتستان کے عوام کو اچھی طرز حکمرانی میسر نہیں آ سکی، تاہم نئی حکومت شفاف، مؤثر اور عوام دوست نظام متعارف کرائے گی۔ ان کے مطابق جدید آٹومیشن سسٹم کے ذریعے عوام کے مسائل کے حل کو آسان بنایا جائے گا تاکہ سرکاری خدمات زیادہ مؤثر انداز میں فراہم کی جا سکیں۔
وزیراعلیٰ نے اعتراف کیا کہ موجودہ انتظامی نظام میں متعدد خامیاں موجود ہیں اور مختلف محکموں میں اصلاحات کی ضرورت ہے، جبکہ حکومت اپنے آئینی دائرہ اختیار میں رہتے ہوئے عوام کو بہتر سہولیات اور خدمات فراہم کرنے کے لیے اقدامات کرے گی۔
