سیرت کانفرنس اور حج انتظامات، طاہر اشرفی کی وفاقی وزیر مذہبی امور سردار محمد یوسف سے ملاقات

اسلام آباد: وفاقی وزیر مذہبی امور و بین المذاہب ہم آہنگی سردار محمد یوسف سے پاکستان علماء کونسل کے چیئرمین اور نٹرنیشنل تعظیمِ حرمین شریفین کونسل کے سیکرٹری جنرل حافظ محمد طاہر محمود اشرفی نے ملاقات کی۔ جس میں مختلف اہم امور پر تبادلہ خیال کیا گیا۔

بین الاقوامی سیرت کانفرنس پر مشاورت

ملاقات میں مجوزہ بین الاقوامی سیرت کانفرنس کے انعقاد پر بھی بات چیت ہوئی۔

حافظ طاہر محمود اشرفی نے کانفرنس سے مثبت نتائج کی امید ظاہر کی۔ انہوں نے کہا کہ سیرتِ طیبہ ﷺ کی روشنی میں نوجوانوں کو درپیش چیلنجز کا حل تلاش کرنا ضروری ہے۔

ان کے مطابق کانفرنس پاکستان اور عالم اسلام کی نوجوان نسل کے لیے مؤثر لائحہ عمل پیش کرنے میں مددگار ثابت ہوسکتی ہے۔

حج انتظامات کو سراہا

حافظ طاہر محمود اشرفی نے گزشتہ حج کے انتظامات پر وزارت مذہبی امور کی کارکردگی کو سراہا۔

انہوں نے حجاج کرام کو فراہم کی جانے والی سہولیات پر وفاقی وزیر اور وزارت کے اقدامات کی تعریف کی۔

ان کا کہنا تھا کہ وزارت نے گزشتہ دو برس کے دوران حج سہولیات میں بہتری کے لیے قابلِ قدر اقدامات کیے ہیں۔

بین المذاہب ہم آہنگی پر بھی گفتگو

ملاقات میں بین المذاہب اور بین المسالک ہم آہنگی کے فروغ پر بھی تفصیلی گفتگو ہوئی۔

شرکا نے مذہبی رواداری اور قومی یکجہتی کو مضبوط بنانے کے اقدامات کا جائزہ لیا۔

قومی پیغامِ امن کمیٹی اور وزارت مذہبی امور کے درمیان رابطہ کاری بڑھانے پر بھی تبادلہ خیال کیا گیا۔

سردار محمد یوسف نے مذہبی قیادت کے کردار کو سراہا

وفاقی وزیر سردار محمد یوسف نے حافظ طاہر محمود اشرفی کا شکریہ ادا کیا۔

انہوں نے قومی پیغامِ امن کمیٹی اور پاکستان علماء کونسل کے کردار کو سراہا۔ ان کے مطابق مذہبی قیادت قومی وحدت اور رواداری کے فروغ میں اہم کردار ادا کر رہی ہے۔

سردار محمد یوسف نے پُرامن بقائے باہمی اور باہمی احترام کے لیے دینی و مذہبی تنظیموں کی کوششوں کو بھی خراجِ تحسین پیش کیا۔