اسلام آباد: پاکستان نے افغانستان میں دہشت گرد گروہوں کے انفراسٹرکچر کے خلاف کی جانے والی کارروائی سے متعلق بھارتی وزارت خارجہ کے بیان کو سختی سے مسترد کرتے ہوئے اسے بے بنیاد، مضحکہ خیز اور حقائق کے منافی قرار دیا ہے۔
ترجمان دفتر خارجہ طاہر حسین اندرابی نے بھارتی وزارت خارجہ کے بیان پر ردعمل دیتے ہوئے کہا کہ بھارت خود پاکستان کے خلاف افغان سرزمین سے سرگرم دہشت گرد گروہوں کی سرپرستی کرتا رہا ہے اور اس حوالے سے اقوام متحدہ کی سلامتی کونسل کے پابندیوں کے نظام کی بھی خلاف ورزی کر رہا ہے۔
انہوں نے کہا کہ بھارت کا طرزِ عمل اقوام متحدہ کے چارٹر اور بین الاقوامی قوانین کے منافی ہے، جبکہ مقبوضہ جموں و کشمیر میں کشمیری عوام کے حقِ خودارادیت کو بھی مسلسل دبایا جا رہا ہے۔
ترجمان دفتر خارجہ کے مطابق بھارت خطے میں امن، سلامتی اور استحکام کی کوششوں میں رکاوٹ ڈالنے والا کردار ادا کر رہا ہے اور اشتعال انگیز بیانات کے ذریعے حقائق کو مسخ کرنے کی کوشش کر رہا ہے۔
طاہر حسین اندرابی نے کہا کہ پاکستان اپنی قومی سلامتی اور شہریوں کے تحفظ کو یقینی بنانے کے لیے دہشت گردی کے خلاف ضروری اور مؤثر اقدامات کرتا رہا ہے اور آئندہ بھی کرتا رہے گا۔
انہوں نے اس عزم کا اعادہ کیا کہ پاکستان دہشت گردی کے خاتمے، سرحدی سلامتی اور علاقائی استحکام کے لیے اپنی کوششیں جاری رکھے گا اور اپنی خودمختاری و قومی مفادات کے تحفظ کے لیے ہر ضروری اقدام اٹھائے گا۔
