دیر بالا: خیبر پختونخوا کے ضلع دیر بالا میں بارش کے دوران ایک دینی مدرسے پر آسمانی بجلی گرنے سے 20 سے زائد طالبات جھلس کر زخمی ہو گئیں، جنہیں فوری طور پر طبی امداد کے لیے اسپتال منتقل کر دیا گیا۔
اطلاعات کے مطابق یہ واقعہ دیر بالا کے علاقے اوصوڑئی درہ کے گاؤں رانگوں میں پیش آیا، جہاں بارش کے دوران خواتین کے دینی مدرسے پر اچانک آسمانی بجلی آ گری۔
حادثے کے نتیجے میں مدرسے میں زیر تعلیم 20 سے زائد طالبات جھلس گئیں۔ واقعے کے فوراً بعد اہلِ علاقہ بڑی تعداد میں مدرسے پہنچے اور زخمی طالبات کو ابتدائی طبی امداد فراہم کی۔
بعد ازاں تمام زخمی طالبات کو مزید علاج کے لیے واڑی اسپتال منتقل کیا گیا، جہاں انہیں طبی سہولیات فراہم کی جا رہی ہیں۔
واقعے کے بعد علاقے میں خوف و ہراس پھیل گیا، جبکہ طالبات کے اہلِ خانہ اپنی بچیوں کی خیریت معلوم کرنے کے لیے مدرسے اور اسپتال پہنچ گئے۔ مقامی افراد کی بڑی تعداد بھی زخمی طالبات کی عیادت اور امدادی سرگرمیوں کے لیے اسپتال میں موجود رہی۔
تاحال کسی طالبہ کی ہلاکت کی اطلاع موصول نہیں ہوئی، جبکہ متعلقہ حکام واقعے کی تفصیلات جمع کر رہے ہیں۔
