کوئٹہ: مانگی ڈیم پولیس اسٹیشن پر دہشتگرد حملے کے بعد پاک فوج، فرنٹیئر کور (ایف سی) اور بلوچستان پولیس کی جانب سے شروع کیا گیا "آپریشن شعبان” بدستور جاری ہے، جبکہ سیکیورٹی ذرائع کے مطابق گزشتہ 24 گھنٹوں کے دوران مزید 17 دہشتگرد مارے گئے ہیں۔
سیکیورٹی ذرائع کے مطابق آپریشن کے دوران فورسز نے دشوار گزار پہاڑی علاقوں میں دہشتگردوں کے ٹھکانوں کو نشانہ بنایا، جہاں فوج اور ایف سی کے مشترکہ آپریشن میں مزید 4 دہشتگرد ہلاک ہوئے، جبکہ متعدد دیگر کے زخمی ہونے کی اطلاعات بھی موصول ہوئی ہیں۔
ذرائع کے مطابق خضدار کے علاقے میں آج صبح دہشتگردوں کی جانب سے ایک پولیس اسٹیشن پر حملے کی کوشش بھی سیکیورٹی فورسز نے ناکام بنا دی، جس کے بعد علاقے میں سرچ اور کلیئرنس آپریشن مزید تیز کر دیا گیا۔
سیکیورٹی حکام کے مطابق آپریشن شعبان کے دوران اب تک ہلاک ہونے والے دہشتگردوں کی مجموعی تعداد 43 ہو چکی ہے، جبکہ ہیلی کاپٹر آپریشنز میں مزید 5 سے 6 دہشتگردوں کی ہلاکت کی اطلاعات بھی سامنے آئی ہیں، جن کی تصدیق کا عمل جاری ہے۔
ذرائع نے بتایا کہ 5 جولائی سے اب تک آپریشن شعبان اور دیگر انٹیلی جنس بیسڈ آپریشنز (IBOs) کے دوران مجموعی طور پر 79 دہشتگرد مارے جا چکے ہیں۔
سیکیورٹی ذرائع کے مطابق فورسز نے دشوار گزار پہاڑی علاقوں میں دہشتگردوں کا گھیرا مزید تنگ کر دیا ہے اور علاقے میں کلیئرنس کارروائیاں مسلسل جاری ہیں۔
