Table of Contents
اسلام آباد: وفاقی کابینہ نے پاکستان، سعودی عرب اور ترکیہ کے درمیان تاریخی مشترکہ دفاعی معاہدے کو اہم سفارتی اور دفاعی پیش رفت قرار دے دیا۔
وزیراعظم محمد شہباز شریف کی زیر صدارت وفاقی کابینہ کا اجلاس اسلام آباد میں ہوا۔ اجلاس کے آغاز پر کابینہ نے معاہدے کے حوالے سے متفقہ قرارداد منظور کی۔
وزیراعظم، اسحاق ڈار اور فیلڈ مارشل کو خراج تحسین
قرارداد میں وزیراعظم محمد شہباز شریف، نائب وزیراعظم و وزیر خارجہ سینیٹر محمد اسحاق ڈار اور چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر کو خراج تحسین پیش کیا گیا۔
کابینہ نے تینوں رہنماؤں کی مدبرانہ اور دور اندیش قیادت کو سراہا۔ قرارداد میں پاکستان کا عالمی تشخص بلند کرنے اور قومی مفادات کے مؤثر دفاع پر بھی قیادت کی تعریف کی گئی۔
کابینہ ارکان نے پاکستان، سعودی عرب اور ترکیہ کے درمیان مشترکہ دفاعی معاہدے کو اہم سفارتی و دفاعی پیش رفت قرار دیا۔
قرارداد کے مطابق یہ معاہدہ مسلم ممالک کے درمیان اتحاد اور اتفاق کو مزید مضبوط بنانے میں اہم کردار ادا کر سکتا ہے۔
نیشنل ہاؤسنگ پالیسی 2026 کی منظوری
وفاقی کابینہ نے نیشنل ہاؤسنگ پالیسی 2026 اور اس پر عمل درآمد کے ایکشن پلان کی بھی منظوری دے دی۔
کابینہ کو بتایا گیا کہ پالیسی قومی اور بین الاقوامی ماہرین پر مشتمل ورکنگ گروپ نے تیار کی ہے۔ اس عمل کے دوران وفاقی وزارتوں، صوبائی حکومتوں اور ترقیاتی شراکت داروں سے بھی مشاورت کی گئی۔
پالیسی کا بنیادی مقصد شہریوں کو پائیدار، محفوظ اور معیاری رہائش فراہم کرنا ہے۔
کابینہ نے ہدایت کی کہ ہاؤسنگ منصوبوں میں زوننگ قوانین کی مکمل پابندی کی جائے۔ زمین کے مؤثر استعمال کے لیے عمودی رہائش کو بھی ترجیح دینے کی ہدایت کی گئی۔
ہاؤسنگ منصوبوں میں توانائی کی بچت پر زور
کابینہ نے انرجی ایفیشنسی کوڈز کو نیشنل ہاؤسنگ پالیسی کا لازمی حصہ بنانے کی ہدایت کی۔
اس اقدام کا مقصد نئی تعمیرات کو توانائی کی بچت اور ماحول دوست تقاضوں سے ہم آہنگ کرنا ہے۔
’اپنا گھر‘ اسکیم میں 220 ارب روپے کے قرض منظور
کابینہ کو وزیراعظم کی ’اپنا گھر‘ اسکیم پر پیش رفت سے بھی آگاہ کیا گیا۔
اجلاس کو بتایا گیا کہ گھر کے خواہشمند درخواست گزاروں کے لیے مختلف بینکوں نے 220 ارب روپے کے قرضے منظور کیے ہیں۔
کامیاب درخواست گزاروں کو اب تک 32 ارب روپے سے زائد کی رقم جاری کی جا چکی ہے۔
پاکستان سویڈن سرمایہ کاری معاہدے سے متعلق فیصلہ
وفاقی کابینہ نے بورڈ آف انویسٹمنٹ کی سمری پر پاکستان اور سویڈن کے درمیان 1981 میں طے پانے والے دوطرفہ سرمایہ کاری معاہدے کے خاتمے کا نوٹس واپس لینے کی منظوری بھی دی۔
پاکستان انفارمیشن سکیورٹی فریم ورک 2026 منظور
وزارت انفارمیشن ٹیکنالوجی نے کابینہ کو پاکستان انفارمیشن سکیورٹی فریم ورک 2026 (PISF 2026) کا مسودہ پیش کیا۔
کابینہ کو بتایا گیا کہ فریم ورک CERT Rules 2023 کے تحت تیار کیا گیا ہے۔
اس کا مقصد انفارمیشن سکیورٹی کے بنیادی معیارات کے لیے جامع اور متحد نظام قائم کرنا ہے۔ فریم ورک کے ذریعے مرکزی نگرانی کو بھی یقینی بنایا جائے گا۔
وفاقی کابینہ نے PISF 2026 کی منظوری دیتے ہوئے اسے سائبر سکیورٹی کے لیے اہم رہنما دستاویز قرار دیا۔
کابینہ نے مقررہ مدت کے اندر اس پر مؤثر عمل درآمد یقینی بنانے کی ہدایت بھی کی۔
آئل ریفائننگ پالیسی میں ترامیم کی توثیق
وفاقی کابینہ نے 28 جولائی کو کابینہ کمیٹی برائے توانائی کے اجلاس میں کیے گئے فیصلے کی بھی توثیق کی۔
فیصلے کے تحت پاکستان آئل ریفائننگ پالیسی 2023 میں مجوزہ ترامیم کی منظوری دی گئی۔ ان ترامیم کا مقصد ملکی آئل ریفائنریز کو اپ گریڈ کرنا ہے۔
حکومت کے مطابق ریفائنریز کی اپ گریڈیشن سے ملکی توانائی کی ضروریات بہتر انداز میں پوری کرنے میں مدد ملے گی۔
اقتصادی رابطہ کمیٹی کے فیصلوں کی توثیق
اجلاس میں 27 جولائی اور 4 اگست کو ہونے والے اقتصادی رابطہ کمیٹی کے اجلاسوں میں کیے گئے فیصلوں کی بھی توثیق کی گئی۔
کابینہ نے کابینہ کمیٹی برائے قانون سازی کے 24 جولائی کے اجلاس میں کیے گئے فیصلوں کی بھی منظوری دے دی۔
