اسلام آباد: وزیراعظم شہباز شریف نے آذربائیجان کے ساتھ پاکستان کے برادرانہ اور اسٹریٹجک تعلقات کو مزید مضبوط بنانے کے غیر متزلزل عزم کا اعادہ کرتے ہوئے کہا ہے کہ گزشتہ ڈھائی برس کے دوران دونوں ممالک کے درمیان اعلیٰ سطح کے تبادلوں نے دوطرفہ شراکت داری کو نئی جہت دی ہے۔
جمعہ کو پاکستان میں آذربائیجان کے سفیر خضر فرہادوف نے وزیراعظم سے الوداعی ملاقات کی، جس میں دوطرفہ تعلقات، باہمی تعاون اور مستقبل کی شراکت داری پر تبادلہ خیال کیا گیا۔
وزیراعظم شہباز شریف نے اپنے دورِ تعیناتی کے دوران پاکستان اور آذربائیجان کے تعلقات کو مزید مستحکم بنانے کے لیے سفیر خضر فرہادوف کی خدمات کو سراہتے ہوئے کہا کہ ان کی کاوشوں سے سیاسی، تجارتی، اقتصادی، دفاعی، ثقافتی اور عوامی روابط کے شعبوں میں نمایاں پیش رفت ہوئی۔
انہوں نے خاص طور پر دونوں ممالک کے درمیان براہِ راست فضائی پروازوں کے آغاز کو ایک اہم سنگِ میل قرار دیتے ہوئے کہا کہ اس سے عوامی روابط، تجارت اور سیاحت کو فروغ ملے گا۔
وزیراعظم نے آذربائیجان کے صدر الہام علیوف کے لیے نیک تمناؤں کا اظہار کرتے ہوئے گزشتہ ڈھائی برس کے دوران اپنے متعدد دورۂ آذربائیجان اور جولائی 2024 میں صدر الہام علیوف کے دورۂ پاکستان کو دونوں ممالک کے تعلقات کے فروغ میں اہم پیش رفت قرار دیا۔
انہوں نے اس امید کا اظہار کیا کہ سفیر خضر فرہادوف کے دورِ تعیناتی میں رکھی گئی مضبوط بنیاد مستقبل میں بھی پاکستان اور آذربائیجان کے تعلقات کو مزید وسعت دینے میں اہم کردار ادا کرے گی۔
وزیراعظم نے سفیر خضر فرہادوف کے لیے ان کی آئندہ سفارتی ذمہ داریوں میں کامیابی اور نیک خواہشات کا اظہار بھی کیا۔
اس موقع پر آذربائیجان کے سفیر خضر فرہادوف نے اپنے دورِ تعیناتی کے دوران حکومتِ پاکستان اور پاکستانی عوام کی جانب سے ملنے والی گرمجوشی، مہمان نوازی اور بھرپور تعاون پر وزیراعظم کا شکریہ ادا کیا۔
انہوں نے کہا کہ پاکستان میں ان کی سفارتی خدمات ان کے کیریئر کا ایک یادگار باب ہیں اور آذربائیجان مستقبل میں بھی پاکستان کے ساتھ اپنی اسٹریٹجک شراکت داری کو مزید گہرا کرنے کے لیے پُرعزم ہے۔
ملاقات کے اختتام پر سفیر خضر فرہادوف نے وزیراعظم شہباز شریف کو ایک کتاب بھی پیش کی، جس میں ان کے خاندان کے پاکستان میں قیام کے دوران حاصل ہونے والے تجربات اور مشاہدات کو قلم بند کیا گیا ہے۔
