واشنگٹن: وفاقی وزیرِ خزانہ و محصولات سینیٹر محمد اورنگزیب نے اپنے امریکی ہم منصب اسکاٹ بیسنٹ سے ملاقات میں پاکستان اور امریکہ کے درمیان اقتصادی تعاون، سرمایہ کاری اور مالیاتی شراکت داری کو مزید مضبوط بنانے پر تبادلہ خیال کیا۔
ملاقات کے دوران وزیر خزانہ نے امریکی وزیر کو پاکستان میں میکرو اکنامک استحکام، پائیدار اور برآمدات پر مبنی اقتصادی ترقی کے لیے حکومت کی جانب سے کیے گئے اصلاحاتی اقدامات سے آگاہ کیا۔ انہوں نے کہا کہ حکومت معیشت کو مستحکم بنانے، سرمایہ کاروں کے اعتماد میں اضافے اور پائیدار ترقی کے لیے اصلاحات کے عمل کو جاری رکھے ہوئے ہے۔
محمد اورنگزیب نے خطے کی موجودہ صورتحال کے پاکستان کی معیشت پر مرتب ہونے والے منفی اثرات سے بھی آگاہ کیا اور کہا کہ علاقائی کشیدگی نے اقتصادی سرگرمیوں اور سرمایہ کاری کے ماحول کو متاثر کیا ہے۔
وزیر خزانہ نے اس موقع پر بین الاقوامی کیپٹل مارکیٹوں تک بہتر رسائی، زرمبادلہ کے ذخائر میں مزید بہتری اور پاکستان کی خودمختار کریڈٹ ریٹنگ میں اضافے کے لیے امریکی تعاون کی ضرورت پر زور دیا۔
دونوں رہنماؤں نے پاکستان اور امریکہ کے درمیان اقتصادی تعلقات کو مزید فروغ دینے، امریکی سرمایہ کاری میں اضافے اور باہمی دلچسپی کے تزویراتی منصوبوں پر پیش رفت جاری رکھنے کے عزم کا اظہار کیا۔
