اسلام آباد: وزیراعظم شہباز شریف کے مشیر برائے سیاسی امور رانا ثناء اللہ نے کہا ہے کہ آزاد کشمیر میں سرگرم کالعدم کمیٹی کا مقصد عام انتخابات کے انعقاد میں رکاوٹ ڈالنا ہے اور وہ ایک جمہوری عمل کو سبوتاژ کرنے کی کوشش کر رہی ہے۔
نجی ٹی وی کے پروگرام "نیا پاکستان” میں گفتگو کرتے ہوئے رانا ثناء اللہ نے کہا کہ بلوچستان میں سیکیورٹی فورسز کی کارروائیوں کے دوران بڑی تعداد میں دہشتگرد مارے جا چکے ہیں، جبکہ دہشتگردی کے خلاف آپریشن پوری شدت سے جاری ہے۔
انہوں نے بتایا کہ بلوچستان میں پاک فوج، فرنٹیئر کور (ایف سی) اور بلوچستان پولیس نے مشترکہ آپریشن شروع کر رکھا ہے، جس کا مقصد دہشتگرد عناصر کا خاتمہ اور علاقے میں امن و استحکام کی بحالی ہے۔
رانا ثناء اللہ کا کہنا تھا کہ بلوچستان میں سرگرم کالعدم تنظیموں کا سیاسی مطالبات سے کوئی تعلق نہیں، بلکہ ان کی کارروائیاں ریاستی اداروں اور عوامی مفادات کو نقصان پہنچانے کے لیے کی جا رہی ہیں۔
انہوں نے کہا کہ حالیہ واقعے میں ڈیم کی حفاظت کے لیے قائم پولیس چوکی کو دہشتگردوں نے نشانہ بنایا، جس کا مقصد علاقے کو اندھیرے میں دھکیلنا اور آبی تنصیبات کو نقصان پہنچانا تھا۔
مشیر وزیراعظم نے زور دے کر کہا کہ اس قسم کی دہشتگرد کارروائیوں کا بلوچستان کے سیاسی مسائل یا مقامی سیاست سے کوئی تعلق نہیں بلکہ یہ محض تخریبی سرگرمیاں ہیں، جن کے خلاف ریاست پوری قوت کے ساتھ کارروائی کر رہی ہے۔
