کوئٹہ: بلوچستان میں سکیورٹی فورسز نے انٹیلی جنس اطلاعات کی بنیاد پر کارروائی کرتے ہوئے 19 دہشتگردوں کو ہلاک کر دیا، جبکہ آپریشن کے دوران 11 اہلکار وطن کے دفاع میں شہید ہوگئے۔
سکیورٹی ذرائع کے مطابق کارروائی بلوچستان کی قومی شاہراہ این-25 پر جھاو کراس اور کرارو کے درمیان کی گئی، جہاں دہشتگردوں نے مبینہ طور پر شاہراہ بلاک کر رکھی تھی اور مسافروں و مقامی شہریوں سے بھتہ وصول کر رہے تھے۔
ذرائع کے مطابق سکیورٹی فورسز نے بروقت انٹیلی جنس بیسڈ آپریشن (آئی بی او) کرتے ہوئے دہشتگردوں کے ٹھکانوں کو نشانہ بنایا، جس کے نتیجے میں 19 دہشتگرد ہلاک جبکہ متعدد دیگر زخمی ہوگئے۔
آپریشن کے دوران شدید فائرنگ کے تبادلے میں سکیورٹی فورسز کے 11 بہادر اہلکار بھی شہید ہوگئے۔
سکیورٹی ذرائع کا کہنا ہے کہ یہ کارروائی اس عزم کا اظہار ہے کہ عوام کی جان و مال، شاہراہوں کے تحفظ اور بلوچستان کے امن کو نقصان پہنچانے کی ہر کوشش کا بھرپور جواب دیا جائے گا۔
انہوں نے مزید کہا کہ دہشتگرد عناصر اور ان کے سہولت کاروں کے خلاف کارروائیاں جاری رہیں گی تاکہ صوبے میں امن و امان کی صورتحال کو مزید مستحکم بنایا جا سکے۔
