تہران، ایرانی پاسدارانِ انقلاب (آئی آر جی سی) نے امریکا کی معاونت کرنے والے علاقائی ممالک کو سخت انتباہ جاری کرتے ہوئے کہا ہے کہ اگر انہوں نے اپنا موجودہ رویہ تبدیل نہ کیا تو انہیں سخت ردِعمل کا سامنا کرنا پڑے گا۔
آئی آر جی سی کی جانب سے جاری بیان میں کہا گیا کہ جب تک امریکا خطے میں دھمکیوں، عسکری مداخلت اور بحری نقل و حرکت پر اثرانداز ہونے کی کوششیں جاری رکھے گا، آبنائے ہرمز بند رہے گی۔
بیان کے مطابق امریکی اقدامات نہ صرف خطے میں کشیدگی میں اضافہ کر رہے ہیں بلکہ علاقائی سلامتی کی صورتحال کو بھی مزید پیچیدہ بنا رہے ہیں۔
پاسدارانِ انقلاب نے دعویٰ کیا کہ گزشتہ شب دو آئل ٹینکروں نے امریکی طیاروں کی ہدایات پر آبنائے ہرمز کے جنوبی حصے سے ایسے بحری راستے کے ذریعے گزرنے کی کوشش کی جسے آئی آر جی سی نے غیر محفوظ قرار دیا تھا۔
بیان میں مزید کہا گیا کہ ان میں سے ایک آئل ٹینکر میں اچانک آگ بھڑک اٹھی، جس کے بعد دونوں جہاز اپنا سفر جاری رکھنے کے بجائے واپس لوٹ گئے۔
یہ بیان ایسے وقت میں سامنے آیا ہے جب ایران اور امریکا کے درمیان کشیدگی میں اضافہ دیکھنے میں آ رہا ہے اور حالیہ دنوں میں دونوں ممالک کی جانب سے ایک دوسرے کے خلاف عسکری اقدامات اور سخت بیانات جاری کیے گئے ہیں، جس کے باعث خلیجی خطے کی سکیورٹی صورتحال عالمی توجہ کا مرکز بنی ہوئی ہے۔
