واشنگٹن: امریکی فوج نے اعلان کیا ہے کہ امریکی سنٹرل کمانڈ (CENTCOM) اور سعودی عرب کی مسلح افواج نے عراق میں ایران کے حمایت یافتہ عسکریت پسند گروہوں کے خلاف مشترکہ اور ہدفی کارروائی کی ہے۔
امریکی سنٹرل کمانڈ کی جانب سے جاری بیان کے مطابق، 28 جولائی کو کی جانے والی اس کارروائی میں عراق میں موجود ان ایران نواز گروہوں کے ٹھکانوں کو نشانہ بنایا گیا جن کے بارے میں امریکی دعویٰ ہے کہ انہیں اسلامی انقلابی گارڈ کور (IRGC) نے امریکی افواج اور سعودی عرب کے توانائی کے بنیادی ڈھانچے پر حملوں کی ہدایات دی تھیں۔
بیان میں کہا گیا کہ امریکی اور سعودی افواج نے انتہائی درستگی کے ساتھ اہداف کو نشانہ بنایا تاکہ خطے میں دہشت گردی کے خطرات کو کم کیا جا سکے اور اتحادی افواج و اہم تنصیبات کے خلاف ممکنہ حملوں کو روکا جا سکے۔
امریکی فوج کے مطابق یہ مشترکہ کارروائی خطے میں سلامتی، استحکام اور مشترکہ دفاعی تعاون کو مضبوط بنانے کی کوششوں کا حصہ ہے، جبکہ امریکا اپنے علاقائی شراکت داروں کے ساتھ مل کر ایران کے حمایت یافتہ مسلح گروہوں کے خلاف کارروائیاں جاری رکھنے کے عزم پر قائم ہے۔
تاحال عراق، ایران یا ایران سے وابستہ گروہوں کی جانب سے اس کارروائی پر کوئی باضابطہ ردعمل سامنے نہیں آیا، جبکہ حملوں میں ہونے والے ممکنہ جانی یا مالی نقصان کی تفصیلات بھی جاری نہیں کی گئیں۔
