واشنگٹن: امریکی صدر ڈونلڈ ٹرمپ نے وائٹ ہاؤس میں یوکرین کے صدر وولوڈیمیر زیلنسکی اور اسرائیلی وزیراعظم بنیامین نیتن یاہو سے الگ الگ بیک ٹو بیک ملاقاتوں کو انتہائی مثبت قرار دیتے ہوئے کہا ہے کہ دونوں رہنماؤں کے ساتھ اہم عالمی امور پر مفید تبادلہ خیال ہوا۔
صدر ٹرمپ نے ملاقاتوں کے بعد سوشل میڈیا پر مختصر پیغامات جاری کرتے ہوئے کہا، "بہت اچھی ملاقات رہی، متعدد اہم موضوعات پر گفتگو ہوئی۔” انہوں نے زیلنسکی سے ملاقات کے حوالے سے بھی اسی نوعیت کا بیان دیتے ہوئے کہا کہ یہ ملاقات بھی انتہائی مثبت رہی، تاہم انہوں نے بات چیت کی تفصیلات بیان نہیں کیں۔
یہ ملاقاتیں ایسے وقت میں ہوئیں جب یوکرین روس کے خلاف جنگ کے دوران اپنے فضائی دفاع کو مضبوط بنانے کے لیے مزید امریکی تعاون اور دفاعی نظام حاصل کرنے کا خواہاں ہے، جبکہ اسرائیلی وزیراعظم نیتن یاہو امریکا کے ساتھ تعلقات میں حالیہ کشیدگی کو کم کرنے کی کوشش کر رہے ہیں۔
رپورٹس کے مطابق نیتن یاہو اور ٹرمپ کے درمیان حالیہ ہفتوں میں ایران، لبنان اور حزب اللہ سے متعلق پالیسیوں پر اختلافات سامنے آئے تھے۔ ملاقات کے دوران ایران، لبنان سے متعلق امریکی ثالثی میں جاری سفارتی کوششوں، اسرائیل اور لبنان کے درمیان فریم ورک معاہدے، اور ابراہیم معاہدوں کے دائرہ کار کو وسعت دینے جیسے امور پر بھی تبادلہ خیال کیا گیا۔
ملاقات سے قبل ایک انٹرویو میں ٹرمپ نے کہا تھا کہ انہیں ایران کی مبینہ جوہری سرگرمیوں سے متعلق مکمل معلومات حاصل ہیں اور اس حوالے سے انہیں اسرائیلی وزیراعظم کی بریفنگ کی ضرورت نہیں۔ ان کا کہنا تھا کہ اگر ایران کے ساتھ سفارتی کوششیں ناکام ہوئیں تو امریکا مزید کارروائی پر بھی غور کر سکتا ہے۔
دوسری جانب یوکرین کے صدر زیلنسکی نے ملاقات کے بعد کہا کہ انہوں نے ٹرمپ کے ساتھ پیٹریاٹ میزائل دفاعی نظام کے انٹرسیپٹرز کی مقامی تیاری کے لیے ممکنہ لائسنسنگ انتظامات اور سفارتی عمل کو دوبارہ فعال بنانے پر گفتگو کی۔ انہوں نے امریکا کی مسلسل حمایت پر شکریہ بھی ادا کیا۔
زیلنسکی نے امریکی سینیٹر لنڈسے گراہم کے انتقال پر تعزیت کرتے ہوئے انہیں "یوکرین کا حقیقی دوست” قرار دیا۔ بعد ازاں امریکی سینیٹ میں روس پر پابندیوں سے متعلق بل پیش کیا گیا، جس کا نام تبدیل کر کے "Lindsey O. Graham Sanctioning Russia and Iran Act 2026” رکھا گیا۔
ادھر وائٹ ہاؤس کے باہر مظاہرین نے اسرائیلی وزیراعظم کے دورے کے خلاف احتجاج بھی کیا اور غزہ جنگ کے حوالے سے نعرے بازی کی۔
