اسلام آباد: آذربائیجان کے سبکدوش ہونے والے سفیر خضر فرہادوف نے سپیکر قومی اسمبلی سردار ایاز صادق سے پارلیمنٹ ہاؤس اسلام آباد میں الوداعی ملاقات کی، جس میں پاکستان اور آذربائیجان کے درمیان برادرانہ تعلقات، پارلیمانی تعاون اور باہمی دلچسپی کے مختلف امور پر تفصیلی تبادلہ خیال کیا گیا۔
ملاقات کے دوران سپیکر سردار ایاز صادق نے آذربائیجانی سفیر کی سفارتی خدمات کو سراہتے ہوئے کہا کہ پاکستان اور آذربائیجان کے تعلقات باہمی احترام، اعتماد اور مشترکہ اقدار پر استوار ہیں۔ انہوں نے دونوں ممالک کے درمیان دوطرفہ تعلقات میں مسلسل پیش رفت پر اطمینان کا اظہار کرتے ہوئے کہا کہ عوامی سطح پر بڑھتے ہوئے روابط دونوں برادر ممالک کے مضبوط تعلقات کی عکاسی کرتے ہیں۔
سپیکر قومی اسمبلی نے کہا کہ پاکستان اور آذربائیجان اہم علاقائی اور عالمی معاملات پر یکساں مؤقف رکھتے ہیں اور دونوں ممالک نے بین الاقوامی و پارلیمانی فورمز پر ہمیشہ ایک دوسرے کی حمایت کی ہے۔ انہوں نے اس بات پر بھی زور دیا کہ مستقبل میں پارلیمانی تعاون کو مزید وسعت دینے سے دوطرفہ تعلقات مزید مستحکم ہوں گے۔
سردار ایاز صادق نے آذربائیجان میں زیرِ تعلیم پاکستانی طلبہ کی بڑھتی ہوئی تعداد کو دونوں ممالک کے درمیان عوامی روابط کے فروغ کی مثبت علامت قرار دیتے ہوئے کہا کہ تعلیمی، ثقافتی اور پارلیمانی تعاون کو مزید بڑھانے کی ضرورت ہے۔
اس موقع پر آذربائیجان کے سفیر خضر فرہادوف نے سپیکر قومی اسمبلی کے خیرسگالی کے جذبات پر شکریہ ادا کیا اور بطور سفیر اپنے دورِ تعیناتی کے دوران حکومت پاکستان اور پاکستانی عوام کی جانب سے ملنے والے احترام، محبت اور تعاون کو سراہا۔
انہوں نے دونوں ممالک کے درمیان پارلیمانی تعلقات کے فروغ کے لیے سپیکر سردار ایاز صادق کی کاوشوں کی تعریف کرتے ہوئے اس امید کا اظہار کیا کہ پاکستان اور آذربائیجان کے درمیان دوطرفہ تعلقات مستقبل میں مزید مضبوط اور وسیع ہوں گے۔
