اسلام آباد میں پاکستان میں امریکی مشن کی جانب سے ریاستہائے متحدہ امریکا کی آزادی کے 250 سال مکمل ہونے کے موقع پر ’’فریڈم 250‘‘ کے عنوان سے ایک پروقار تقریب کا انعقاد کیا گیا، جس میں امریکی جمہوریت کے ڈھائی صدیوں پر محیط سفر اور پاکستان و امریکا کے درمیان دیرینہ تعلقات کو خراجِ تحسین پیش کیا گیا۔
یہ تقریب امریکا کے 250ویں یومِ آزادی کی عالمی تقریبات کا حصہ تھی، جبکہ اس موقع پر پاکستان اور امریکا کے درمیان دوستی اور سفارتی تعلقات کے 80 برس مکمل ہونے کی خوشی بھی منائی گئی۔ تقریب میں سرکاری حکام، کاروباری شخصیات، سول سوسائٹی کے نمائندے، ماہرین تعلیم اور ثقافتی شخصیات سمیت مختلف شعبہ ہائے زندگی سے تعلق رکھنے والے معزز مہمانوں نے شرکت کی۔
تقریب سے خطاب کرتے ہوئے پاکستان میں امریکا کی ناظم الامور Natalie Baker نے کہا کہ آزادی کے 250 سال مکمل ہونے کا جشن نہ صرف امریکی تاریخ کے ایک اہم سنگ میل کی یاد دلاتا ہے بلکہ ان اقدار کا بھی اظہار ہے جو پاکستان اور امریکا کو ایک دوسرے کے قریب لاتی ہیں۔
انہوں نے کہا کہ آزادی، جمہوریت اور شراکت داری کے اصول آج بھی دنیا بھر میں لوگوں اور اقوام کے لیے باعثِ ترغیب ہیں۔ ان کا کہنا تھا کہ ’’آج ہم امریکا کی آزادی کے 250 سال اور پاکستان و امریکا کے عوام کے درمیان دوستی کے 80 سال کا جشن اکٹھے منا رہے ہیں، اور مستقبل میں بھی دونوں ممالک مل کر مزید کامیابیاں حاصل کریں گے۔‘‘
تقریب کے دوران امریکی میرین کور کے کلر گارڈ نے دونوں ممالک کے پرچم پیش کیے جبکہ پاکستان اور امریکا کے قومی ترانے بھی بجائے گئے۔ بعد ازاں امریکی فضائیہ کی سینٹرل کمانڈ کے بینڈ نے موسیقی کا خصوصی پروگرام پیش کیا جسے شرکاء نے خوب سراہا۔
تقریب کے اختتام پر شاندار آتش بازی کا مظاہرہ کیا گیا جس سے اسلام آباد کی فضائیں روشن ہو گئیں۔ منتظمین کے مطابق یہ آتش بازی امریکا کی 250ویں سالگرہ کے ساتھ ساتھ پاکستان اور امریکا کے درمیان مستقبل میں مزید مضبوط تعلقات اور تعاون کی علامت بھی تھی۔
واضح رہے کہ ’’فریڈم 250‘‘ ریاستہائے متحدہ امریکا کے اعلانِ آزادی کے 250 سال مکمل ہونے کی مناسبت سے دنیا بھر میں امریکی سفارتی مشنز کے زیر اہتمام منعقد کی جانے والی سال بھر کی تقریبات کا حصہ ہے۔ اس قومی جشن کا آغاز Donald Trump نے ’’امریکی عظمت کے ایک نئے دور‘‘ کے عنوان سے کیا تھا۔
