اسلام آباد: پاکستان میں جمہوریہ قازقستان کے سبکدوش ہونے والے سفیر یرژان کِسٹافن نے پارلیمنٹ ہاؤس اسلام آباد میں سپیکر قومی اسمبلی سردار ایاز صادق سے الوداعی ملاقات کی، جس میں دونوں ممالک کے درمیان دوطرفہ تعلقات، پارلیمانی روابط اور اقتصادی تعاون کو مزید فروغ دینے کے عزم کا اعادہ کیا گیا۔
ملاقات کے دوران سردار ایاز صادق نے اپنے سفارتی دور میں پاکستان اور قازقستان کے تعلقات کو مضبوط بنانے میں سفیر یرژان کِسٹافن کی خدمات کو خراجِ تحسین پیش کرتے ہوئے کہا کہ انہوں نے دونوں ممالک کے درمیان دوطرفہ تعاون کو نئی جہت دینے میں اہم کردار ادا کیا۔ انہوں نے سفیر کے لیے مستقبل کی ذمہ داریوں اور پیشہ ورانہ زندگی میں کامیابی کے لیے نیک تمناؤں کا اظہار بھی کیا۔
اس موقع پر قازقستان کے سفیر یرژان کِسٹافن نے سپیکر قومی اسمبلی کی جانب سے تعاون اور حوصلہ افزائی پر شکریہ ادا کرتے ہوئے عالمی سطح پر تنازعات کے پرامن حل کے لیے پاکستان کی سفارتی کوششوں کو سراہا۔ انہوں نے پاکستان میں اپنے دورِ تعیناتی کے دوران حکومت اور عوام کی جانب سے ملنے والی عزت، مہمان نوازی اور تعاون پر بھی دلی تشکر کا اظہار کیا۔
ملاقات کے اختتام پر دونوں فریقین نے اس امید کا اظہار کیا کہ پاکستان اور قازقستان کے درمیان سیاسی، پارلیمانی، اقتصادی اور علاقائی تعاون مستقبل میں مزید مضبوط ہوگا اور دونوں برادر ممالک باہمی شراکت داری کو نئی بلندیوں تک لے جائیں گے۔
