آزاد جموں و کشمیر قانون ساز اسمبلی کے انتخابات کے پہلے مرحلے کے مکمل غیر سرکاری اور غیر حتمی نتائج کے مطابق پاکستان مسلم لیگ (ن) نے واضح برتری حاصل کرتے ہوئے 13 میں سے 9 نشستوں پر کامیابی حاصل کر لی، جبکہ پاکستان پیپلز پارٹی 4 نشستیں جیتنے میں کامیاب رہی۔
پہلے مرحلے میں میرپور ڈویژن کے تین اضلاع میرپور، کوٹلی اور بھمبر کے 13 حلقوں میں پولنگ ہوئی۔ ووٹنگ کا عمل صبح 8 بجے شروع ہوا اور چیف الیکشن کمشنر کی ہدایت پر پولنگ کا وقت ایک گھنٹہ بڑھاتے ہوئے شام 6 بجے تک جاری رکھا گیا۔ انتخابات کے دوران امن و امان برقرار رکھنے کے لیے سخت سکیورٹی انتظامات کیے گئے۔
غیر سرکاری نتائج کے مطابق حلقہ ایل اے-1 میرپور سے مسلم لیگ (ن) کے اظہر صادق، ایل اے-4 سے چوہدری رخسار احمد، ایل اے-5 بھمبر سے وقار احمد نور، ایل اے-7 سے چوہدری طارق فاروق، ایل اے-9 کوٹلی سے عمیر نعیم، ایل اے-11 سے محمد آصف، ایل اے-12 سے محمد ریاست خان اور ایل اے-13 سے راجہ ایاز احمد خان کامیاب قرار پائے۔
دوسری جانب پاکستان پیپلز پارٹی نے ایل اے-2 میرپور سے قاسم مجید، ایل اے-3 سے چوہدری یاسر سلطان، ایل اے-8 کوٹلی سے ظفر اقبال ملک اور ایل اے-10 سے چوہدری محمد یاسین کے ذریعے چار نشستیں اپنے نام کیں۔
انتخابی عمل کے دوران مجموعی طور پر صورتحال پرامن رہی، تاہم چند مقامات پر معمولی جھڑپوں کی اطلاعات بھی موصول ہوئیں۔ پولنگ مکمل ہونے کے بعد ووٹوں کی گنتی کا عمل انجام دیا گیا اور تمام 13 حلقوں کے غیر سرکاری و غیر حتمی نتائج سامنے آگئے۔
الیکشن حکام کے مطابق میرپور ڈویژن میں رجسٹرڈ ووٹرز کی تعداد تقریباً 14 لاکھ تھی، تاہم گزشتہ انتخابات کے مقابلے میں اس بار ووٹ ڈالنے کی شرح نسبتاً کم رہی۔ حکام کا کہنا ہے کہ انتخابات کے پہلے مرحلے کے بعد آئندہ مراحل میں مظفرآباد ڈویژن میں 2 اگست جبکہ پونچھ ڈویژن میں 10 اگست کو پولنگ ہوگی۔
