پاکستان میں قازقستان کے سبکدوش ہونے والے سفیر یرژان کسٹافن نے اپنی سفارتی ذمہ داریاں مکمل ہونے پر اعلیٰ تعلیمی کمیشن (ایچ ای سی) کے چیئرمین سے الوداعی ملاقات کی، جس میں پاکستان اور قازقستان کے درمیان اعلیٰ تعلیم کے شعبے میں دوطرفہ تعاون، تعلیمی روابط اور مستقبل کی شراکت داری پر تفصیلی تبادلہ خیال کیا گیا۔
ملاقات کے دوران چیئرمین ایچ ای سی نے سفیر یرژان کسٹافن کی خدمات کو سراہتے ہوئے کہا کہ انہوں نے پاکستان اور قازقستان کے درمیان اعلیٰ تعلیم کے شعبے میں تعاون کو فروغ دینے اور دونوں ممالک کے تعلیمی اداروں کے درمیان روابط مضبوط بنانے میں اہم کردار ادا کیا۔
چیئرمین ایچ ای سی نے پاکستان اور قازقستان کے دیرینہ برادرانہ تعلقات کا ذکر کرتے ہوئے اس عزم کا اظہار کیا کہ دونوں ممالک کے درمیان تعلیمی تعاون کا سلسلہ آئندہ بھی مزید مضبوط بنایا جائے گا۔ انہوں نے جامعات کے درمیان شراکت داری، مشترکہ تحقیقی منصوبوں، طلبہ و اساتذہ کے تبادلوں اور علمی سرگرمیوں کے فروغ کی اہمیت پر بھی زور دیا۔
اس موقع پر دونوں فریقوں نے اعلیٰ تعلیم کے شعبے میں جاری تعاون کو مزید وسعت دینے، تعلیمی شراکت داری کو مستحکم بنانے اور باہمی مفاد کے نئے مواقع سے بھرپور استفادہ کرنے کے عزم کا اعادہ کیا۔
