مسقط: یمن کی حوثی اکثریتی تنظیم انصار اللہ کے ذرائع کے مطابق علاقائی کشیدگی اور یمن کی صورتحال پر عمان میں حوثی قیادت اور سعودی وفد کے درمیان اہم ملاقات ہوئی، جس میں امن مذاکرات کی بحالی اور خطے میں استحکام سے متعلق امور پر تبادلہ خیال کیا گیا۔
حوثی ذرائع کے مطابق انصار اللہ کے سیاسی بیورو کے ترجمان محمد عبدالسلام نے عمان کے دارالحکومت مسقط میں سعودی وفد سے ملاقات کی۔ ملاقات کے دوران علاقائی سلامتی، یمن کی موجودہ صورتحال اور کشیدگی کم کرنے کے لیے ممکنہ اقدامات پر گفتگو ہوئی۔
قطری ٹی وی کی رپورٹ کے مطابق یمن کے لیے اقوامِ متحدہ کے خصوصی ایلچی اور عمانی حکام نے دونوں فریقوں پر زور دیا ہے کہ وہ تعطل کا شکار امن مذاکرات کو دوبارہ شروع کریں تاکہ سیاسی حل کی راہ ہموار ہو سکے۔
رپورٹس میں کہا گیا ہے کہ اقوامِ متحدہ، سعودی عرب اور انصار اللہ کے متعدد اعلیٰ عہدیدار بھی اس وقت عمان میں موجود ہیں، جہاں یمن سے متعلق مذاکرات کے دوسرے دور کے انعقاد کا امکان ظاہر کیا جا رہا ہے۔
یہ پیش رفت ایسے وقت میں سامنے آئی ہے جب حالیہ دنوں میں یمن کے حوثیوں اور سعودی عرب کے درمیان کشیدگی میں اضافہ دیکھا گیا ہے، جبکہ بین الاقوامی برادری خطے میں تنازع کے پُرامن حل کے لیے سفارتی کوششیں تیز کرنے پر زور دے رہی ہے۔
