یروشلم: غزہ کے لیے بورڈ آف پیس کے اعلیٰ نمائندے نکولے ملاڈینوف نے اسرائیلی کابینہ کے اس فیصلے کا خیرمقدم کیا ہے، جس کے تحت غزہ کی پٹی میں بین الاقوامی استحکام فورس (International Stabilization Force) کے محدود داخلے کی منظوری دی گئی ہے۔
نکولے ملاڈینوف نے اپنے بیان میں کہا کہ وہ اسرائیل کے ان اقدامات کا خیرمقدم کرتے ہیں جو اقوام متحدہ کی سلامتی کونسل کی قرارداد 2803 کے مطابق غزہ میں بین الاقوامی استحکام فورس کی تعیناتی کی راہ ہموار کرتے ہیں۔
انہوں نے کہا کہ یہ اقدام غزہ کو مستحکم کرنے، غیر فوجی بنانے کی کوششوں کی حمایت اور منظور شدہ عبوری فریم ورک کے تحت انتظامی منتقلی کے عمل کو مؤثر بنانے کے لیے انتہائی اہم ہے۔
ملاڈینوف نے مزید کہا کہ اب توجہ غزہ کے لیے مجوزہ 20 نکاتی منصوبے پر عمل درآمد کو یقینی بنانے پر مرکوز ہونی چاہیے، جس میں ثالث ممالک کی جانب سے پیش کیے گئے روڈ میپ پر پیش رفت بھی شامل ہے۔
دوسری جانب اطلاعات کے مطابق حماس نے تاحال امریکی صدر ڈونلڈ ٹرمپ کے غزہ سے متعلق 20 نکاتی منصوبے کے تحت غیر مسلح ہونے کی تجویز قبول نہیں کی، جبکہ بورڈ آف پیس اس منصوبے کے بعض اہم نکات پر اسرائیلی منظوری حاصل کرنے کی کوششیں جاری رکھے ہوئے ہے۔
