انقرہ: ترکیہ کے جنوب مشرقی صوبے شرناق میں منعقد ہونے والی ایک شاہانہ شادی گزشتہ دو روز سے ملکی اور بین الاقوامی سوشل میڈیا پر توجہ کا مرکز بنی ہوئی ہے، جہاں دولہا اور دلہن کو 60 لاکھ ترک لیرا (تقریباً ڈیڑھ لاکھ امریکی ڈالر) مالیت کے تحائف دیے گئے، جبکہ مہمانوں کی ضیافت کے لیے 35 بھیڑیں ذبح کی گئیں۔
یہ دو روزہ شادی کی تقریب شرناق کے بوشہاب علاقے کے گاؤں موتلوجا میں منعقد ہوئی، جس میں ترکیہ کے مختلف شہروں اور بیرون ملک سے ہزاروں مہمان شریک ہوئے۔ تقریب کے دوران روایتی ترک لوک رقص "ہالائے” پیش کیا گیا اور شرکا نے ترکیہ کا بڑا قومی پرچم بھی لہرایا۔
ترک میڈیا کے مطابق دلہن کو سونے کے قیمتی زیورات جبکہ دولہا کو لاکھوں لیرا نقد رقم بطور تحفہ دی گئی۔ مجموعی طور پر تحائف کی مالیت 60 لاکھ ترک لیرا تک جا پہنچی، جس نے اس شادی کو ملکی میڈیا کی نمایاں خبروں میں شامل کر دیا۔
مہمانوں کی تواضع کے لیے 35 بھیڑیں ذبح کی گئیں اور ہزاروں افراد کے لیے خصوصی دعوت کا اہتمام کیا گیا۔ تقریب کی تصاویر اور ویڈیوز سوشل میڈیا پر وائرل ہونے کے بعد صارفین نے اس پر مختلف آراء کا اظہار کیا۔
دولہا کے نمائندے سیف اللہ انجن نے بتایا کہ اگرچہ تحائف کی مالیت غیر معمولی تھی، تاہم خاندان کے نزدیک سب سے اہم چیز رشتہ داروں اور دوستوں کا باہمی اتحاد، محبت اور بھائی چارے کا جذبہ تھا۔ انہوں نے بتایا کہ انہوں نے خود دولہا کو 2 لاکھ 50 ہزار ترک لیرا کا تحفہ پیش کیا۔
دوسری جانب دلہن روجین ارجان نے تقریب پر خوشی کا اظہار کرتے ہوئے کہا کہ ان کے لیے سب سے قیمتی تحفہ اہل خانہ اور دوستوں کی محبت اور شرکت ہے۔ دولہا کے چچا نے بھی ترکیہ اور بیرون ملک سے آنے والے تمام مہمانوں کا شکریہ ادا کرتے ہوئے کہا کہ یہ شادی علاقے کی یادگار تقریبات میں شمار ہوگی۔
سوشل میڈیا پر ملا جلا ردعمل
اس منفرد شادی نے سوشل میڈیا پر ایک نئی بحث چھیڑ دی ہے۔ بعض صارفین نے اسے ترکیہ کی قدیم قبائلی اور ثقافتی روایات کا خوبصورت اظہار قرار دیا، جبکہ دیگر نے موجودہ معاشی حالات میں شادی پر اتنی بڑی رقم خرچ کرنے کو غیر ضروری اور فضول اسراف قرار دیا۔
ترکیہ کے جنوب مشرقی علاقوں میں، جہاں قبائلی روایات آج بھی مضبوط ہیں، کئی روز تک جاری رہنے والی بڑی شادیوں کا انعقاد معمول کی بات سمجھا جاتا ہے۔ ان تقریبات میں ہزاروں مہمان شریک ہوتے ہیں، دولہا دلہن کو نقد رقم اور سونے کے قیمتی تحائف دیے جاتے ہیں اور اجتماعی ضیافتوں کا اہتمام کیا جاتا ہے تاکہ نئی ازدواجی زندگی کے آغاز میں خاندان کی معاونت کی جا سکے۔
گزشتہ چند برسوں کے دوران بھی ترکیہ میں متعدد شادیاں اپنے غیر معمولی اخراجات، مہنگے تحائف اور ہزاروں مہمانوں کی شرکت کے باعث عالمی میڈیا اور سوشل میڈیا پر خبروں کی زینت بنتی رہی ہیں، جو اس بات کی عکاسی کرتی ہیں کہ معاشی چیلنجز کے باوجود ملک کے بعض علاقوں میں یہ روایات آج بھی برقرار ہیں۔
English Tags: Turkey, Turkish Wedding, Sirnak, Luxury Wedding, Viral Wedding, Turkish Lira, Wedding Gifts, 35 Sheep, Social Media, Halay Dance, Turkish Culture, Gold Jewelry, Viral News, World News, Middle East, Traditional Wedding, Rojin Arjan, Seifullah Injen, Wedding Ceremony, Turkey News
