ایران میں امریکا کے ساتھ بڑھتی ہوئی کشیدگی کے دوران ایک بار پھر حکومت کی حمایت اور امریکا کے خلاف بڑے عوامی مظاہرے شروع ہو گئے ہیں۔ دارالحکومت تہران سمیت مختلف علاقوں میں ہزاروں افراد سڑکوں پر نکل آئے اور ایرانی مسلح افواج سے اظہارِ یکجہتی کیا۔
تہران کے معروف انقلاب اسکوائر میں ہونے والے مرکزی مظاہرے میں خواتین، بچوں اور مختلف طبقۂ فکر سے تعلق رکھنے والے شہریوں نے بھرپور شرکت کی۔ مظاہرین نے امریکا مخالف نعرے لگانے کے ساتھ ساتھ ایرانی حکومت اور مسلح افواج کے حق میں بھی آواز بلند کی۔
مظاہرین کی بڑی تعداد ایرانی قومی پرچم اٹھائے ہوئے تھی، جبکہ متعدد افراد نے سرخ پرچم بھی لہرائے جنہیں انتقام اور مزاحمت کی علامت قرار دیا جاتا ہے۔ شرکاء نے اس عزم کا اظہار کیا کہ ملکی خودمختاری اور سلامتی کے تحفظ کے لیے وہ اپنی قیادت اور دفاعی اداروں کے ساتھ کھڑے ہیں۔
یہ مظاہرے ایسے وقت میں سامنے آئے ہیں جب خطے میں ایران اور امریکا کے درمیان کشیدگی میں اضافہ دیکھا جا رہا ہے، جس کے باعث مشرقِ وسطیٰ کی مجموعی صورتحال بھی انتہائی حساس ہو چکی ہے۔
