ابوظہبی: متحدہ عرب امارات نے دعویٰ کیا ہے کہ آبنائے ہرمز کے قریب عمان کے علاقائی پانیوں میں دو آئل ٹینکروں کو ایرانی کروز میزائلوں سے نشانہ بنایا گیا، جس کے نتیجے میں عملے کا ایک رکن ہلاک جبکہ آٹھ دیگر زخمی ہوگئے۔
اماراتی وزارت دفاع کے مطابق یہ واقعہ آبنائے ہرمز کی جنوبی شپنگ لین میں پیش آیا، جہاں دو تجارتی ٹینکروں پر مبینہ طور پر دو کروز میزائل داغے گئے۔ حکام کا کہنا ہے کہ حملے میں عملے کا ایک بھارتی شہری جان کی بازی ہار گیا جبکہ آٹھ افراد زخمی ہوئے، جن میں چار کی حالت تشویشناک بتائی گئی ہے۔
وزارت دفاع کے مطابق حملے کے بعد دونوں ٹینکروں میں آگ بھڑک اٹھی، تاہم امدادی کارروائیوں کے بعد آگ پر قابو پا لیا گیا۔
متحدہ عرب امارات نے اس واقعے کی شدید مذمت کرتے ہوئے اسے بین الاقوامی قانون اور بحری جہاز رانی کے اصولوں کی سنگین خلاف ورزی قرار دیا ہے۔ اماراتی حکام کا کہنا ہے کہ ملک اپنی خودمختاری، قومی سلامتی اور سمندری راستوں کے تحفظ کے لیے تمام ضروری اقدامات کرنے اور مناسب جواب دینے کا حق محفوظ رکھتا ہے۔
یہ واقعہ ایسے وقت پیش آیا ہے جب آبنائے ہرمز میں کشیدگی مسلسل بڑھ رہی ہے اور عالمی سطح پر توانائی کی ترسیل اور بین الاقوامی جہاز رانی کے حوالے سے خدشات میں اضافہ ہو رہا ہے۔
