اسلام آباد: نائب وزیراعظم و وزیر خارجہ سینیٹر محمد اسحاق ڈار اور ایران کے وزیر خارجہ عباس عراقچی کے درمیان ٹیلیفونک رابطہ ہوا، جس میں خطے کی مجموعی صورتحال، کشیدگی میں کمی اور سفارتی کوششوں پر تبادلہ خیال کیا گیا۔
ترجمان دفتر خارجہ کے مطابق دونوں رہنماؤں نے خطے میں موجود سیکیورٹی صورتحال اور حالیہ پیش رفت کا جائزہ لیا۔
اسحاق ڈار نے گفتگو کے دوران اس بات پر زور دیا کہ اسلام آباد مفاہمتی یادداشت کے مطابق تمام فریق تحمل، برداشت اور کشیدگی میں کمی کا راستہ اختیار کریں تاکہ خطے میں امن و استحکام کو فروغ دیا جا سکے۔
انہوں نے کہا کہ پاکستان کے نزدیک پائیدار امن کے لیے مذاکرات، سفارتکاری اور سیاسی حل ہی سب سے مؤثر راستہ ہیں، جبکہ اسلام آباد خطے میں امن، استحکام اور تعمیری سفارتی کردار ادا کرنے کے اپنے عزم پر قائم ہے۔
ترجمان کے مطابق دونوں وزرائے خارجہ نے مستقبل میں بھی قریبی رابطے برقرار رکھنے اور خطے کی صورتحال پر مشاورت جاری رکھنے پر اتفاق کیا۔
