نیویارک: اقوام متحدہ میں پاکستان کے مستقل مندوب عاصم افتخار نے خطے میں بڑھتی ہوئی کشیدگی پر گہری تشویش کا اظہار کرتے ہوئے کہا ہے کہ تشدد اور عدم استحکام کا تسلسل کسی بھی فریق کے مفاد میں نہیں، جبکہ سفارتکاری اور مسلسل مذاکرات ہی تمام متنازع امور کے پائیدار حل کا واحد راستہ ہیں۔
اقوام متحدہ میں اپنے خطاب کے دوران عاصم افتخار نے کہا کہ پاکستان خطے میں کشیدگی میں کمی، جنگ بندی اور پائیدار علاقائی استحکام کے لیے تعمیری سفارتی کوششیں جاری رکھے ہوئے ہے اور تمام متعلقہ فریقوں پر تحمل اور ذمہ داری کا مظاہرہ کرنے پر زور دیتا ہے۔
انہوں نے کہا کہ حساس سفارتی مذاکرات کے دوران ایسے بیانات اور اقدامات سے گریز کیا جانا چاہیے جو غلط فہمیوں، کشیدگی یا تنازع میں مزید اضافے کا باعث بن سکتے ہوں۔
پاکستان کے مستقل مندوب نے اس بات پر بھی زور دیا کہ تمام توجہ اور سفارتی کوششوں کا مرکز اسلام آباد مفاہمتی یادداشت (Islamabad Memorandum of Understanding) پر مؤثر عمل درآمد کو یقینی بنانا ہونا چاہیے، کیونکہ یہی فریم ورک خطے میں امن، اعتماد سازی اور دیرپا استحکام کے لیے اہم بنیاد فراہم کرتا ہے۔
عاصم افتخار نے کہا کہ پاکستان خطے میں امن کے قیام، مذاکرات کے فروغ اور تنازعات کے پرامن حل کے لیے اپنا تعمیری کردار مستقبل میں بھی جاری رکھے گا۔
