اسلام آباد: پاکستان نے خطے میں بڑھتی ہوئی کشیدگی پر گہری تشویش کا اظہار کرتے ہوئے تمام متعلقہ فریقوں پر زور دیا ہے کہ وہ تحمل کا مظاہرہ کریں، کشیدگی میں اضافے کا باعث بننے والے اقدامات سے گریز کریں اور سفارت کاری کے ذریعے مسائل کے حل کو ترجیح دیں۔
ترجمان دفتر خارجہ کی جانب سے جاری بیان میں کہا گیا ہے کہ کسی بھی نئے تنازع یا فوجی تصادم میں کسی بھی فریق کا مفاد نہیں، جبکہ خطے میں پائیدار امن اور استحکام کے لیے مسلسل رابطہ، مذاکرات اور سفارت کاری ہی مؤثر راستہ ہے۔
ترجمان نے تمام فریقوں پر زور دیا کہ وہ اسلام آباد مفاہمتی یادداشت کے تحت کیے گئے اپنے وعدوں اور ذمہ داریوں کی مکمل پاسداری کریں۔
بیان میں کہا گیا کہ یہ مفاہمتی یادداشت خطے اور اس سے باہر باہمی افہام و تفہیم، احترام اور مشترکہ خوشحالی کے فروغ کے لیے ایک مضبوط اور دیرپا بنیاد فراہم کرتی ہے۔
دفتر خارجہ نے اس عزم کا اعادہ کیا کہ پاکستان خطے میں امن، استحکام اور تنازعات کے سفارتی حل کے فروغ کے لیے اپنا تعمیری کردار آئندہ بھی جاری رکھے گا۔
