44
حیدرآباد: صوبہ سندھ میں غیر قانونی طور پر مقیم 49 افغان شہریوں کو گرفتار کرنے کے بعد افغانستان ڈی پورٹ کر دیا گیا۔
ضلعی انتظامیہ اور پولیس کی مشترکہ کارروائی کے دوران حیدرآباد شہر کے مختلف علاقوں میں چھاپے مارے گئے، جہاں غیر قانونی طور پر مقیم افغان شہریوں کو حراست میں لیا گیا۔
ڈی آئی جی حیدرآباد کے ترجمان کے مطابق کارروائی کے دوران گرفتار کیے گئے تمام افراد کو ابتدائی قانونی کارروائی کے بعد ایک ہولڈنگ پوائنٹ منتقل کیا گیا۔
بعد ازاں اسسٹنٹ کمشنر نور حسین کی نگرانی میں تمام 49 غیر قانونی افغان شہریوں کو افغانستان واپس بھیج دیا گیا۔
پولیس حکام کا کہنا ہے کہ غیر قانونی طور پر مقیم غیر ملکی شہریوں کے خلاف کارروائیاں حکومتی پالیسی کے تحت جاری رہیں گی، جبکہ متعلقہ ادارے ایسے افراد کی شناخت اور وطن واپسی کے عمل کو یقینی بنا رہے ہیں۔
