اسلام آباد: وزیراعظم محمد شہباز شریف نے کہا ہے کہ ملکی معیشت کی پائیدار ترقی کے لیے صنعت و حرفت کا فروغ اور بیرونی سرمایہ کاری میں اضافہ ناگزیر ہے۔ انہوں نے کہا کہ صنعتی پیداوار بڑھانے اور برآمدات میں اضافے کے لیے مؤثر پالیسی اقدامات حکومت کی ترجیحات میں شامل ہیں۔
وزیراعظم آفس کے میڈیا ونگ کے مطابق وزیراعظم شہباز شریف کی زیر صدارت سرمایہ کاری میں اضافہ اور معیشت کی مجموعی ترقی کے لیے شعبہ جاتی اصلاحات اور پالیسی اقدامات سے متعلق جائزہ اجلاس منعقد ہوا، جس میں متعلقہ وزارتوں نے مختلف زیر غور تجاویز پر بریفنگ دی۔
وزیراعظم نے اجلاس سے خطاب کرتے ہوئے کہا کہ صنعت و تجارت سمیت تمام معاشی شعبوں میں اصلاحات طویل المدتی معاشی استحکام اور عوامی فلاح پر مرکوز ہونی چاہئیں۔ انہوں نے کہا کہ مستقبل کی توانائی ضروریات کو متبادل ذرائع سے پورا کرنے کے لیے جامع حکمت عملی پر کام جاری ہے۔
انہوں نے مزید کہا کہ توانائی کی بچت اور سستی ٹرانسپورٹ کے فروغ کے لیے الیکٹرک وہیکلز پالیسی وقت کی اہم ضرورت ہے۔ وزیراعظم نے ہدایت کی کہ جدید ٹیکنالوجی کو مختلف شعبوں میں شامل کرنے کے لیے وزارتوں اور ماہرین کے درمیان مؤثر مشاورت یقینی بنائی جائے۔
شہباز شریف نے کہا کہ ترقیاتی پالیسیوں کے مؤثر نفاذ کے لیے تمام وزارتیں باہمی تعاون اور ہم آہنگی کے ساتھ کام کریں، جبکہ تمام اصلاحاتی اقدامات میں شفافیت اور بہترین کارکردگی حکومت کی اولین ترجیح ہے۔
اجلاس میں نائب وزیراعظم و وزیر خارجہ اسحاق ڈار، وزیر خزانہ محمد اورنگزیب، وزیر اقتصادی امور احد خان چیمہ، وزیر اطلاعات عطاء اللہ تارڑ، وزیر موسمیاتی تبدیلی مصدق ملک، وزیر پیٹرولیم علی پرویز ملک، وزیر پاور اویس لغاری، ایس آئی ایف سی کے ڈائریکٹر جنرل میجر جنرل اسد الرحمان چیمہ سمیت متعلقہ حکام نے شرکت کی۔
