Table of Contents
اسلام آباد: قومی ڈیٹا بیس اینڈ رجسٹریشن اتھارٹی (نادرا) نے 18 سال سے کم عمر بچوں کے لیے جووینائل کارڈ کے اجرا کا باقاعدہ طریقہ کار جاری کر دیا ہے، جس کے تحت والدین یا قانونی سرپرست چند آسان مراحل مکمل کرکے اپنے بچوں کا شناختی کارڈ حاصل کر سکتے ہیں۔
نادرا کے مطابق جووینائل کارڈ حاصل کرنے کے لیے سب سے پہلے والدین یا قانونی سرپرست کو بچے کی نادرا میں رجسٹریشن کرانی ہوگی۔ رجسٹریشن مکمل ہونے کے بعد ٹوکن حاصل کیا جائے گا، جس کے بعد بچے کی تصویر اور انگلیوں کے نشانات نادرا کے ریکارڈ میں محفوظ کیے جائیں گے۔
حکام کے مطابق درخواست کے دوران والدین یا قانونی سرپرست کی بائیومیٹرک تصدیق لازمی ہوگی تاکہ درخواست کی درستگی اور قانونی حیثیت کو یقینی بنایا جا سکے۔
درخواست کا مکمل طریقہ کار
نادرا کی جانب سے جاری کردہ طریقہ کار کے مطابق:
- بچے کی نادرا میں رجسٹریشن کرائی جائے۔
- متعلقہ نادرا سینٹر سے ٹوکن حاصل کیا جائے۔
- بچے کی تصویر اور فنگر پرنٹس ریکارڈ کیے جائیں۔
- والدین یا قانونی سرپرست کی بائیومیٹرک تصدیق مکمل کی جائے۔
- ڈیٹا انٹری کے بعد درخواست اپروول آفیسر کو بھیجی جائے۔
- درخواست منظور ہونے کے بعد آن لائن فیس جمع کرائی جائے۔
- مقررہ مدت میں جووینائل کارڈ وصول کیا جا سکے گا۔
جووینائل کارڈ کی فیس اور ڈلیوری ٹائم
نادرا نے مختلف کیٹیگریز کے تحت فیس اور کارڈ کی فراہمی کا وقت بھی جاری کیا ہے:
| سروس | فیس | ڈلیوری کا وقت |
|---|---|---|
| نارمل سروس | 750 روپے | 31 دن |
| ارجنٹ سروس | 1,500 روپے | 23 دن |
| ایگزیکٹو سروس | 2,500 روپے | 9 دن |
درخواست کے لیے درکار معلومات
نادرا کے مطابق جووینائل کارڈ کی درخواست بچے کے والد، والدہ یا قانونی سرپرست جمع کرا سکتے ہیں۔ اگر درخواست والدہ یا قانونی سرپرست جمع کرائیں تو ان کی موجودگی لازمی ہوگی۔
درخواست کے دوران درج ذیل معلومات فراہم کرنا ضروری ہوں گی:
- والدین کے فنگر پرنٹس
- موبائل نمبر
- ای میل ایڈریس
- کمپیوٹرائزڈ پیدائشی سرٹیفکیٹ کی تفصیلات
نادرا نے شہریوں کو ہدایت کی ہے کہ جووینائل کارڈ سے متعلق مزید معلومات یا رہنمائی کے لیے ہیلپ لائن 1777 یا نادرا کی سرکاری ویب سائٹ سے رابطہ کیا جا سکتا ہے۔
