تہران: ایرانی پارلیمنٹ کے اسپیکر محمد باقر قالیباف نے امریکی صدر ڈونلڈ ٹرمپ کے حالیہ بیان پر شدید ردعمل دیتے ہوئے کہا ہے کہ سابق ایرانی سپریم لیڈر آیت اللہ علی خامنہ ای کے قاتلوں کو کسی صورت معاف نہیں کیا جائے گا اور انتقام کا آخری مرحلہ یروشلم کی آزادی کے ذریعے مکمل ہوگا۔
اپنے بیان میں باقر قالیباف نے کہا کہ اسلامی جمہوریہ ایران پر حملہ کرنے والوں اور ملک کے شہداء، بالخصوص امت کے رہبر کے قاتلوں کو اپنے اقدامات کی پوری قیمت چکانا ہوگی۔
انہوں نے کہا کہ گزشتہ چار ماہ سے ایرانی عوام مسلسل "امریکا مردہ باد” اور "اسرائیل مردہ باد” کے نعرے لگا رہے ہیں اور اپنے شہید رہنما کے قاتلوں سے انتقام کا مطالبہ کر رہے ہیں۔
ایرانی پارلیمنٹ کے اسپیکر نے مزید کہا کہ ایران کی جانب سے جاری سفارتی مذاکرات بھی ملک کی وسیع تر تہذیبی اور نظریاتی جدوجہد کا حصہ ہیں، جس کا مقصد استکباری طاقتوں کا مقابلہ کرنا اور قومی مفادات کا تحفظ یقینی بنانا ہے۔
باقر قالیباف کا بیان ایسے وقت سامنے آیا ہے جب خطے میں ایران، امریکا اور اسرائیل کے درمیان کشیدگی بدستور برقرار ہے اور حالیہ ہفتوں میں مختلف عسکری اور سفارتی بیانات نے صورتحال کو مزید حساس بنا دیا ہے۔
دوسری جانب امریکی صدر ڈونلڈ ٹرمپ کی جانب سے ایران سے متعلق سخت مؤقف اور حالیہ بیانات کے بعد دونوں ممالک کے درمیان لفظی جنگ میں مزید شدت دیکھنے میں آ رہی ہے، جبکہ عالمی برادری خطے میں بڑھتی ہوئی کشیدگی پر گہری نظر رکھے ہوئے ہے۔
