وزیراعظم شہباز شریف ترکیہ کے دوطرفہ سرکاری دورے پر استنبول پہنچ گئے، جہاں اتاترک ایئرپورٹ پر ترکیہ کے وزیر تجارت پروفیسر ڈاکٹر عمر بولات، ترکیہ میں پاکستان کے سفیر ڈاکٹر یوسف جنید اور ترک وزارت خارجہ و پاکستانی سفارت خانے کے اعلیٰ حکام نے ان کا پرتپاک استقبال کیا۔
وزیراعظم کے ہمراہ نائب وزیراعظم و وزیر خارجہ سینیٹر محمد اسحاق ڈار اور وفاقی وزیر اطلاعات و نشریات عطاء اللہ تارڑ بھی موجود ہیں۔
یہ دورہ ترکیہ کے صدر رجب طیب اردوان کی خصوصی دعوت پر کیا جا رہا ہے، جس کے دوران دونوں رہنما پاکستان اور ترکیہ کے درمیان دوطرفہ تعلقات، اقتصادی تعاون اور علاقائی امور پر تفصیلی تبادلہ خیال کریں گے۔
ذرائع کے مطابق ملاقات میں تجارت، سرمایہ کاری، اقتصادی شراکت داری، صنعتی تعاون اور باہمی دلچسپی کے دیگر شعبوں کو مزید وسعت دینے کے امکانات کا جائزہ لیا جائے گا۔ اس کے علاوہ خطے کی مجموعی امن و سلامتی کی صورتحال، مشرق وسطیٰ اور دیگر بین الاقوامی معاملات بھی مذاکرات کے ایجنڈے میں شامل ہوں گے۔
وزیراعظم شہباز شریف اپنے دورۂ ترکیہ کے دوران پاکستان کی میزبانی میں منعقد ہونے والی ایک اہم بزنس کانفرنس سے بھی خطاب کریں گے، جہاں پاکستانی معیشت میں سرمایہ کاری کے مواقع عالمی سرمایہ کاروں کے سامنے پیش کیے جائیں گے۔
کانفرنس میں خصوصی اقتصادی زونز (SEZs)، توانائی، انفارمیشن ٹیکنالوجی، بنیادی ڈھانچے، نجکاری اور دیگر اہم شعبوں میں سرمایہ کاری کے امکانات اجاگر کیے جائیں گے تاکہ ترکیہ کے سرمایہ کاروں کو پاکستان میں کاروباری مواقع سے آگاہ کیا جا سکے۔
اس بزنس کانفرنس میں ترکیہ کے ممتاز کاروباری رہنما، سرمایہ کار، سرکاری حکام اور مختلف صنعتی شعبوں سے وابستہ شخصیات شریک ہوں گی، جبکہ دونوں ممالک کے درمیان اقتصادی شراکت داری کو مزید مضبوط بنانے کے لیے مختلف تجاویز پر بھی غور کیا جائے گا۔
پاکستان اور ترکیہ کے درمیان تاریخی، برادرانہ اور اسٹریٹجک تعلقات موجود ہیں، اور دونوں ممالک مختلف شعبوں میں تعاون کو مزید وسعت دینے کے عزم کا اعادہ کرتے رہے ہیں۔ یہ دورہ دونوں ممالک کے اقتصادی اور سفارتی تعلقات کو مزید مضبوط بنانے کی جانب ایک اہم پیش رفت قرار دیا جا رہا ہے۔
